Rreziku nga bombolat, ISHTI: Të rritet vëmendja gjatë verës, penalizime për subjektet
Me rritjen e temperaturave të stinës së verës, shtohet ndjeshëm përdorimi i bombolave në te gjitha ambientet si ato familjare edhe ato publike çka kërkon edhe kujdes dhe vëmendje më të madhe nga të gjithë konsumatorët dhe përdoruesit.
Për këtë arsye, Inspektorati Shtetëror Teknik dhe Industrial kërkon rritje të kujdesit, në mënyrë që të shmanget çdo rrezik. Sipas ISHTI, pavarësisht se bombolat janë të sigurta, nëse nuk përdoren si duhet dhe nuk zbatohen rregullat e përcaktuara, mund të rezultojë me shpërthime, zjarre, humbje të pasurisë dhe më e rëndësishmja humbje të jetës së qytetarëve.
Ndaj sipas ISHTI përdoruesit familjarë nuk duhet të përdorin bombola të vjetra, që janë jashtë afateve te kolaudimit te datuar ne trupin e bombolës, nuk duhet te mbushen ne pikat e karburantit dhe në te gjitha rastet nga shitësi i bombolave te mbushura duhet te pajisen me flete palosjen për cilësinë e vete bombolës, te instalimit dhe përdorimit.
Po ashtu, pas çdo zëvendësimi të bombolës duhet të kryhet prova e hermeticitetit të instalimit me ujë e sapun për të zbuluar rrjedhjet, ndërsa ambienti në te cilin duhet te zëvendësohet duhet te jete i hapur dhe i ajrosur.
Po ashtu, ISHTI kërkon të mos kryhen gatime pa mbikëqyrje, ndërsa kur ndjehet erë gazi, duhet mbyllur ventili i bombolës, nuk duhet kryer asnjë veprim sidomos goditje metalike apo kyçje/çkyçje e çelësit te dritave dhe të kryhet ajrosje e plote e ambientit.
Ndërkaq, sa i takon subjekteve, nga inspektimet e kryera nga ISHTI gjate muajve Prill dhe Maj 2018 ne zonat bregdetare ka rezultuar se mjaft subjekte si hotele, komplekse turistike apo bare – restorante, përdorin rezervuare me gaz të lëngshëm natyror për qëllime te biznesit.
Për këtë arsye subjektet duhet të kryejnë çdo vit kontrollin teknik të instalimit të rezervuarit dhe të pajisen me skemën teknologjike të instalimit të miratuar, pasi në të kundërt do të penalizohen.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.