Rritet konsumi i birrës në 6 muaj – Afro 600 mijë litra më shumë se 2016

Temperaturat e larta të muajve të fundit kanë ndikuar edhe në rritjen e konsumit të pijeve në vend. Kështu konsumi i birrës ka njohur rritje gjatë gjysmës së parë të këtij viti, ku sipas statistikave zyrtare të Drejtorisë së Përgjithshme të Doganave, sasia e birrës së importuar arrin në 4 331 mijë litra, ose 582  mijë litra më shumë se e njëjta periudhë e një viti më parë.

Sipas këtyre të dhënave, në 6 muajt e parë të vitit që shkoi  në tregun vendas janë importuar 3 749 mijë litra birrë. Por edhe pse administrate doganore jep vetëm sasinë e importuar të këtij produkti, në këto të dhëna nuk specifikohet se sa është sasia e  konsumuar, çka do të nxirrte në pah dhe sa është sasia e prodhimit vendas.

Tregu i birrës është ndër më të “lakmuarit” dhe diskutimet për akcizën e birrës  në kohën kur diskutohet paketa fiskale janë të ashpra.

Prodhuesit vendas gjithnjë janë ankuar se është krijuar një treg i pandershëm dhe kanë kërkuar vazhdimisht uljen e taksës së akcizës për këtë produkt, me arsyetimin e rritjes së produktit vendas dhe rritjen e punësimit.

Aktualisht prodhimi vendas i birrës e ndan tregun ndërmjet katër kompanive kryesore, Birra Tirana, Birra Stela, Birra Korça, Birra Kaon apo Elbar.

Por një përqindje të lartë në treg zënë edhe birrat e importit, të cilat në jo pak raste janë favorizuar edhe nga niveli më i ulët i akcizës, duke konkurruar bindshëm prodhimin vendas.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.