Rritja e borxheve për energjinë – Preçi: Keqmenaxhimi i OSHEE-së iu “faturua” bizneseve përmes rritjes së çmimit

Rritja e borxhit të bizneseve, ndaj OSHEE-së për fatura të papaguara po reflekton vështirësitë e krijuara, si pasojë e politikave të gabuara për nxjerrjen në tregun e liberalizuar të energjisë, në një periudhë të papërshtatshme”.

Eksperti i ekonomisë Zef Preçi thotë për TV SCAN se një treg i liberalizuar energjie është domosdoshmëri, por rasti i bizneseve të lidhur në tensionin 20, 10 dhe 6 KV, sipas tij tregon se kostot e keqmenaxhimit të kompanisë publike të furnizimit, iu faturuan bizneseve përmes rritjes së çmimit.

Po ashtu, eksperti kritikon ndërmarrjen e këtij procesi, në një kohë kur nuk ishin krijuar kushtet e nevojshme, sikurse është ngritja e bursës së energjisë apo krijimi i kushteve të përshtatshme për instalimin e paneleve fotovoltaike për vetëprodhimin e energjisë.

Në kushtet, kur janë edhe një sërë kostosh të tjera, që janë rritur, Preçi nuk përjashton falimentimin e bizneseve, si pasojë e pamundësisë për të likuiduar faturat.

Sipas ekspertit, qeveria duhet të ndërhyjë me një sërë masash, teksa një prej tyre është edhe përjashtimi nga TVSH i impianteve fotovoltaike për qëllime vetëprodhimi.

Nga 1 janari i këtij viti 7500 biznese u nxorën në tregun e liberalizuar të energjisë, duke u përballur me rritjen e çmimit të energjisë. Ndërkohë që, sipas të dhënave zyrtare, për periudhën janar-mars të këtij viti, borxhet që bizneset kanë ndaj OSHEE për fatura të papaguara u rrit me 507 mln lekë, teksa niveli i detyrimeve të prapambetura arriti në 11.9 mld lekë.

Që prej vitit 2017 për këtë kategori tendenca e faturave të papaguara ishte në rënie, me përjashtim të vitit 2021, ku përgjatë gjithë vitit u shënua një rritje me 293 mln lekë, në raport me 2020-ën.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.