Shqipëria dhe Serbia bashkohen për turizmit – Ofertë e përbashkët për tregjet e treta

Dy ministritë përgjegjëse për turizmin të Shqipërisë dhe Serbisë kanë nënshkruar një marrëveshje bashkëpunimi në Beograd, për oferta të përbashkëta turistike drejtuar tregjeve të treta.

Marrëveshja parashikon gjithashtu promovim të përbashkët të turizmit mes Shqipërisë e Serbisë, paketa të përbashkëta, programe arsimore, aftësim profesional të personelit, si dhe studime dhe projekte kërkimore në fushën e turizmit.

“Së bashku me ministrin Lajic ne do të punojmë që ofertat të mos jenë vetëm shqiptare dhe serbe por të jenë një bashkëpunim midis gjashtë institucioneve të turizmit të rajonit tonë së bashku me Malin e Zi, Bosnje–Hercegovinën, Kosovën dhe Maqedoninë”, u shpreh ministri i Turizmit dhe Mjedisit, Blendi Klosi.

Nga ana e tij, ministri serb u shpreh se me produktin e përbashkët turistik shtohet mundësia që të tërheqin turistët, para se gjithash të tregjeve të treta. “Nuk ka rrugë më të mirë se sa turizmi dhe eksperiencat personale që mund të kenë njerëzit për të tejkaluar çdo pengesë”, tha Lajic.

Pas takimit të dy ministrave u zhvillua edhe një  takim midis  tur operatorëve shqiptarë dhe serbë.

Gjatë qëndrimit  në Beograd, ministri Klosi mori pjesë edhe në takimin e dytë të nivelit të lartë të samitit të pyjeve midis Kinës dhe vendeve të Europës Lindore. Ministri Klosi shprehu angazhimin e qeverisë shqiptare në rikthimin e ekuilibrave natyrorë dhe zhvillimin e qëndrueshëm të mjedisit.

“Qeveria shqiptare, si pjesë e këtij mekanizmi, ka qenë dhe mbetet e angazhuar për të plotësuar objektivat e këtij bashkëpunimi në vijim. Iniciativa e Ministrisë të Turizmit dhe Mjedisit për mbjelljen e 20 milion e 200 mijë mijë pemëve në kuadër të nismës “Clean and Green 2020”, është një shprehje e qartë e vullnetit nga ana jonë në kuadër të këtij bashkëpunimi” – u shpreh Klosi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.