Shqipëria në OKB – Rama flet 15 min të Premten përballë liderëve, ndërkohë takon Mitsotakis

Kryeministri Rama ndodhet për një vizitë pune në New York, në kuadër të Asamblesë së përgjithshme të OKB-së. Kryeministri shqiptar do të ketë 15 minutat e tij në dispozicion për t`iu drejtuar liderëve të botës ditën e Premte, atëherë kur është parashikuar nga agjenda që ai të flasë. Kryeministri i Shqipërisë do ta marrë kështu fjalën në sesionin e paradites gjatë së Premtes.

Ndërkohë, deri atëherë, kryeministri shqiptar duket se po e shfrytëzon kohën për të zhvilluar takime me rëndësi, sidomos sa i përket rrugëtimit europian të vendit tonë, duke pasur parasysh se na ndan më pak se 1 muaj nga vendimi për çeljen ose jo të negociatave. Të Hënën pasdite, kreu i ekzekutivit shqiptar u takua me homologun e tij grek, Mitsotakis, me fokus pikërisht te vendimi i 18 Tetorit si dhe marrëdhëniet dypalëshe.

Kryeministri grek kërkoi nga kryeministri Rama respektimin e të drejtave të minoritetit grek në Shqipëri, e sidomos të drejtën e pronës. Mediat greke bëjnë me dije se kryeministri shqiptar është shprehur i gatshëm për të punuar me palën greke për çështje të caktuara. Ditën e Premte, kryeministri grek do të flasë në OKB menjëherë pas kryeministrit Rama. Tema kryesore e punimeve të asamblesë së 74-të të OKB-së është pa diskutim klima.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.