Shqiptarët blenë më shumë dhe më shtrenjtë – Viti 2021 “tejkalon” pandeminë, rritet konsumi i karburantit dhe mallrave të përditshme
Të ardhurat doganore janë realizuar afro 240 milionë dollarë mbi planin gjatë vitit që lam pas, duke “tejkaluar” krizën e pandemisë për shkak të rritjes së ndjeshme të importeve. Por veç rritjes së fluksit të importeve, një peshë të konsiderueshme prej 21 për qind të shtesës në të ardhura, e mban edhe rritja e çmimeve, çka tregon se qytetarët shqiptarë përpos rritjes së konsumit gjatë vitit që kaloi, kanë blerë mallra me kosto më të lartë. Por çfarë është importuar më së shumti dhe çfarë ka kushtuar më shtrenjtë gjatë vitit 2021?
Refeuar të dhënave të detajuara të Drejtorisë së Përgjithshme të Doganave, 30.8 Mld lek më shumë janë mbledhur nga Tatimi mbi Vlerën e Shtuar. Në këtë zë, nga importi i energjisë elektrike janë mbledhur 4.5 miliardë lekë më shumë, ndërkohë 4 mld lekë shtesë kanë ardhur nga rritja e importit dhe konsumit të karburantit, me 4 miliardë lekë më shumë ka kontribuuar rritja e e konsumit të mallrave të përditshëm.
Po ashtu, vihet re 3.2 miliardë lek rritje nga importi i metaleve bazë; 1.8 Mld lekë nga importi i automjeteve të përdorura; 1.3 Mld lekë gaz i lëngshëm si dhe në shifra më të ulëta kanë kontribuuar rritja e importit të plastikës dhe artikujve të saj, veshjeve dhe tekstileve, konstruksionet metalike apo ushqimet e pregatitura. Nga ana tjetër, akciza ka dhënë një kontribut të shtuar më 7.1 miliardë lekë, që ka ardhur si rrjedhojë e rritjes së importit të karburantit me 3.4 miliardë lekë, rritja e importit të cigareve me 2.7 miliardë lekë dhe birrës po ashtu. Ndërsa 1.2 miliardë lekë më shumë janë mbledhur nga taksat doganore për shkak të rifillimit të importit të mallrave me origjinë jashtë BE.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.