Si do të shpërndahen 3.2 miliardë lekë në bujqësi? – Mbështetje e kufizuar në blegtori. Sa përfitojnë bujqësia, peshkimi dhe bletaria
Pavarësisht se mbarështimi i bagëtive ka ardhur në rënie dhe po ashtu prodhimi i qumështit ka shënuar nivelin më të ulët, skema e subvencioneve në blegtori edhe për këtë vit do të jetë e njëjtë. Pak ditë më parë Shoqata e Industrisë së Përpunimit të Qumështit, sugjeroi që skema për mbështetjen e blegtorisë duhet të ndryshojë duke hequr kufizimet, në mënyrë që të incentivohen fermerët.
Por sipas vendimit të miratuar nga qeveria, përcaktohet se për tufën bazë të matrikuluar (kafshët riprodhuese), për fermat me jo më pak se 100 krerë dele dhe/ose dhi, mbështetja është në vlerën 1 200 lekë/krerë, por jo më shumë se 360 mijë lekë për subjekt, Ndërsa për fermat me jo më pak se 10 krerë lopë, jepet mbështetje në vlerën 10 mijë lekë/krerë, por jo më shumë se 500 mijë lekë për subjekt. Kështu, çdo fermë me më pak se 100 krerë dele dhe dhi apo me më pak se 10 krerë lopë, përjashtohet nga skemat mbështetëse.
Ndërkaq, në vendim parashikohet mbështetja për bujqësinë, kryesisht për inputet bujqësore nga 200-500 mijë lekë për hektarë, serat diellore ku subvencionohet në 50% të vlerës totale të faturave tatimore por jo më shumë se 13 milionë lekë për hektarë, bimët aromatike mjekësore 60 mijë deri në 1 milionë lekë për hektarë, dhe 100-200 mijë lekë për fermat organike . Mbështetje është parashikuar gjithashtu edhe për bletarinë me 1 mijë lekë për zgjua për ferma me jo më pak se 50 zgjoje si dhe do të mbështetet rinovimi dhe blerja e anijeve të peshkimit.
Mbështetja në këtë sektor është nga 1 deri në 20 milionë lekë. Për ndërtimin e tregjeve të produkteve bujqësore dhe/ose tregjeve të kafshëve të gjalla për shoqëritë aksionare me kapital 100% shtetëror, ofrohen subvencione në vlerën e 30 milionë lekëve. Vëmendje e veçantë i është kushtuar dixhitalizimit në bujqësi, ku janë parashikuar të jepen deri në 50 milionë lekë mbështetje për ngritjen e një skeme kombëtare trajnimi në bujqësi dhe ngritjen e Qendrës së Ekselencës dhe Inovacionit të Sistemeve Prodhuese, në Universitetin Bujqësor të Tiranës (UBT), në bashkëpunim me një nga universitetet evropiane.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.