Situatë lufte? Çfarë u dikton ligji kompanive private – Të vënë në dispozicion të mbrojtjes civile, makinat, ambientet, objektet, burimet

Konflikti Rusi-Ukrainë, i cili shpesh jep sinjale se mund të përhapet përtej kësaj zone, ka ngritur shumë pikëpyetje për mënyrën si vendet do të përballen me rreziqet e vështirësitë që sjell një konflikt ushtarak, nga furnizimi me produkte ushqimore të popullsive, deri te çështjet e sigurisë së jetës së tyre.

Aktualisht të gjitha vendet po analizojnë kapacitetet e tyre për t’i garantuar sigurinë dhe furnizimin normal të popullatave me produktet e rëndësishme, ndërkohë që kanë nxjerrë nga “sirtarët” edhe ligjet që përcaktojnë detyrimet e shteteve e sektorit privat në rastin e emergjencave ushtarake. Ligje që shpesh ndryshojnë edhe raportin e shtetit me sektorin privat përpara një kërcënimi ushtarak. Shtetet u japin vetes të drejtën të marrin në përdorim nga subjektet private, ambiente, objekte, burime energjetike, ashtu si dhe informacion pa pagesë.

Por çfarë parashikon legjislacioni shqiptar lidhur me mbrojtjen civile dhe cilat janë detyrimet që kanë subjektet private në emergjencat ushtarake? Neni 61 i Ligjit për Mbrojtjen Civile cakton këto detyrime për kompanitë, qofshin të huaja a shqiptare:

a) të hartojnë dhe të përditësojnë plane të brendshme për emergjencat civile, të harmonizuara me planet e jashtme për emergjencat civile të bashkisë, apo bashkive dhe qarkut apo qarqeve.

b) të sigurojnë me shpenzimet e tyre pajisjet e alarmit për punonjësit e tyre dhe për komunitetin, si dhe të garantojnë funksionimin e tyre, kur ato kanë mbi 20 punëmarrës;

c) të informojnë punonjësit e tyre për rreziqet e mundshme, t’u sigurojnë atyre kushte dhe mundësi për realizimin e mbrojtjes së tyre;

ç) të njoftojnë dhe të japin alarmin për komunitetin e rrezikuar dhe të njoftojnë te numri i unifikuar i thirrjeve emergjente 112, Agjencinë Kombëtare të Mbrojtjes Civile, numrat e tjerë të emergjencave, apo edhe autoritetet e tjera, sipas ligjit, në rastet e fatkeqësive;

d) të sigurojnë trajnimin për punonjësit e tyre, për parandalimin dhe përballimin e fatkeqësive, kur ato kanë mbi 20 punëmarrës;

dh) të bashkëpunojnë me strukturat e mbrojtjes civile dhe me njësitë e vetëqeverisjes vendore ku ata ushtrojnë veprimtarinë e tyre;

e) të aktivizojnë shërbimin në përgjigje të situatës së krijuar nga fatkeqësia në këtë zonë dhe në ndihmë të subjekteve të tjera;

ë) të vendosin në dispozicion të strukturave të mbrojtjes civile automjete, mjete, mjedise private, objekte, pajisje dhe burime energjetike, sipas kërkesës së strukturave të mbrojtjes civile;

f) dhe së fundmi të vendosin pa pagesë, në dispozicion të Agjencisë Kombëtare të Mbrojtjes Civile dhe të njësive të vetëqeverisjes vendore, të dhënat që ato disponojnë dhe që janë të nevojshme për përgatitjen e vlerësimit të riskut nga fatkeqësitë dhe planit për emergjencat civile.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.