Tarifat e shpërblimit për veprat e mbrojtura – Tatimet “formalizojnë” vendimin e Këshillit Kombëtar për të Drejtën e Autorit
Drejtoria e Përgjithshme e Tatimeve iu është drejtuar të gjithë tatimpaguesve që preken nga tarifat e reja të miratuara nga Këshilli Kombëtar për të Drejtën e Autorit pak ditë më parë.
Ky institucion i bën me dije tatimpaguesve subjekt të së drejtës së autorit, të tregohen korrekt me deklarimin e të ardhurave të përfituara nga veprimtaria e tyre për efekt të tatimit mbi të ardhurat personale.
Tatimet do të angazhohen në mënyrë aktive për të formalizuar këtë treg, çka do të sjellë për pasojë edhe konkurrencë të lirë dhe do t’i japë fund abuzimeve e problematikave të mbartura ndër vite.
DPT kujton edhe përfituesit nga këto të ardhura të regjistrojnë, deklarojnë dhe paguajnë detyrimet që rrjedhin nga kjo shtesë në të ardhurat personale.
Ashtu sikurse njoftonte edhe Ministria e Kulturës, metodologjia e caktuar shmang mundësinë e paligjshme që Agjencitë e Administrimit Kolektiv të abuzojnë me fuqinë e tyre të tregut, pasi tarifat do të jenë transparente.
Tarifat që do të aplikohen janë si më poshtë:
Radiot dhe Televizionet do të paguajnë në bazë të përqindjes që vepra e mbrojtur zë në programacionin 24-orësh. Sipas tabelës, një Televizion Kombëtar Publik do të duhet të paguajë 2% të të ardhurave bruto në rast se 11-35% të kohës televizive transmeton vepra të tilla.
Nëse këto subjekte janë radio apo televizione lokale, në formulë shtohet edhe tarifa fikse në bazë të numrit të banorëve të përcaktuar në licencë.
Edhe për televizionet kabllorë, apo platformat dixhitale, IPTV, OTT do të paguhet në varësi të kohës që veprat zënë në programacionin e tyre.
Sakaq strukturat akomoduese si hotelet, motelet, resortet, bujtinat, etj. do të paguajnë në bazë të një sistemi me pikë, ku subjekti do të paguajë për çdo përcjellës qendror, altoparlant, TV apo radio nëpër dhoma e mjedise të përbashkëta.
Nga kjo vlerë do të zbritet 20-30% e tarifës nëse struktura akomoduese nuk gjendet në bregdet, destinacione turistike, apo në qarqet Tiranë, Fier dhe Gjirokastër.
Konkretisht, nëse një hotel në Ksamil ka 10 dhoma me nga 1 televizor (10×17), 1 sistem audio qendror (1×170) me 4 bokse (4×8), si edhe 1 televizor në dhomën e pritjes (1×46), atëherë ky subjekt duhet të paguajë shumatoren e këtyre pikëve (x10), të konvertuara në lekë, pra 4180 lekë në muaj.
Për vendet ku konsumohen ushqime apo pije, si restorantet dhe diskotekat tarifat janë të përcaktuara në bazë të orarit që qëndrojnë hapur dhe kapacitetit maksimal të ofrimit të shërbimit. Kështu, një zgarë në Tiranë që qëndron hapur deri në orën 10 të darkës dhe ka hapësirë për 150 persona duhet të paguajë 6000 lekë në muaj.
Qendrat tregtare dhe dyqanet brenda tyre do të tarifohen sipas sipërfaqes, ku 1 pikë është 10 lekë dhe mbahet për metër katror:
Sipërfaqja në m2 | Pikë/ m2 |
Deri në 50 m2 | 1 |
51-200 m2 | 0.75 |
Mbi 200 m2 | 0.5 |
Përdoruesit e veprave të mbrojtura, biznese të tjera jashtë qendrave tregtare do të paguajnë 80% të vlerës së llogaritur sipas tabelës së mësipërme. Panairet, spektaklet dhe tregjet e tjera të përkohshme do të kenë një tarifë prej 300 pikësh në ditë, ndërsa mjetet të cilat realizojnë promocion me altoparlant kanë një tarifë ditore prej 10 pikësh.
Nga këto tarifa nuk do të shpëtojnë as autobusat dhe taksitë:
Përdorimi i materialeve audiovizive me të drejtë e autorit do të paguhet edhe nga palestrat, kurset e kërcimit, etj.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.