Të ardhurat e Shtatorit, në minimum – TVSH-ja me dobësi, shifrat më të ulëta të antiinformalitetit

Arka e shtetit ka mbledhur 343.5 miliardë lekë në 9 muajt e parë të vitit, ndërsa të ardhurat nga tatimet dhe doganat, kanë qenë në minimum, pavarësisht se përkojnë me një nga muajt ku fushata antiinformalitet ka qenë në kulmin e saj. Kështu, referuar treguesve fiskale të publikuara nga Ministria e Financave, gjatë muajit Shtator nga tatimet dhe doganat janë mbledhur 25.6 miliardë lekë, më pak se muajt Korrik dhe Gusht dhe në të njëjtën vlerë me muajin Qershor, ku plani operacional nuk kishte nisur ende, ndërsa në krahasim me 9 mujorin 2018, janë mbledhur 7 miliardë lekë më shumë.

TVSH-ja vijon të tregojë dobësi në të ardhura, ku për periudhën  Janar-Shtator 2019,  janë mbledhur 4.6 miliardë lekë më pak krahasuar me të njëjtën periudhë të një viti më parë dhe në total, regjistrohet 100.7 miliardë në lekë. Me  rënie prej 2.5 miliardë lekë paraqiten të ardhurat nga taksat nacionale dhe të tjera, pasi janë mbledhur 26.4 miliardë lekë.

Ndërkaq, Tatimi mbi fitimin ka pasur perfomancë në rritje me 2.8 miliardë lekë krahasuar me vjet, ku janë mbledhur  27.1 miliardë lekë,  tatimi mbi të ardhurat personale po ashtu, ka kontribuuar pozitivisht, ku janë vjelur 37.4 miliardë lekë, apo 9.5 miliardë lekë më shumë se 9-mujori 2018. Po ashtu, edhe pushteti vendor ka rritur të ardhurat ndjeshëm, me rreth 3.4 miliardë lekë.

Sa i takon shpenzimeve kapitale, janë disbursuar 41.4 miliardë lekë, apo rreth 46 për qind e fondit total, duke ia lënë pjesën më të madhe fundit të vitit, ashtu sikurse ndodhi gjatë 2018-ës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.