Të ardhurat nga taksat mjedisore – Arritën në 51 miliardë lekë për vitin 2018
Të ardhurat e buxhetit nga taksat mjedisore arritën në gati 51 miliardë lekë për vitin 2018. Sipas të dhënave të Instat, këto të ardhura regjistruan një rritje vjetore me 7.3%. Kjo ishte njëkohësisht edhe vlera më e lartë e të ardhurave nga taksat mjedisore për pesë e fundit të mbuluara nga statistikat. Në terma realë, të ardhurat nga këto taksa përbëjnë rreth 3.12% të Prodhimit të Brendshëm Bruto.
Taksat mjedisore klasifikohen ato të lidhura kryesisht me konsumin e karburanteve dhe përdorimin e mjeteve të transportit.
Të ardhurat nga taksat e energjisë për vitin 2018 përbënin rreth 49.4% të gjithë të ardhurave nga taksat mjedisore. Pesha e tyre specifike pësoi një rënie të ndjeshme me gati katër pikë përqindje krahasuar me vitin 2017.
Gjatë vitit 2018, të ardhurat nga taksat e transportit u rritën me 16.7% dhe arritën vlerën e 23.7 miliardë lekëve. Pesha e tyre specifike u rrit ndjeshëm dhe arriti në pothuajse 46.5% të të ardhurave nga taksat mjedisore. Sipas metodologjisë së Instat, taksat e transportit lidhen kryesisht me pronësinë dhe përdorimin e automjeteve. Këto taksa përfshijnë edhe taksat mbi mjetet e tjera të transportit dhe shërbimet e tyre. Pjesa e mbetur e të ardhurave nga taksat e mjedisit lidhet sidomos me taksat e ndotjes, që zënë pak më shumë se 4% të totalit. Këto taksa lidhen me pagesat për menaxhimin e mbetjeve dhe për format e tjera të ndotjes së mjedisit, duke përjashtuar taksën e karbonit, që përfshihet në taksat e energjisë.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.