Të ulet taksa për intelektin, të rritet për korporatat – Bushati: Të këmbehet e përshkallëzuar taksa e punës me taksën e kapitalit

Taksimi i drejtë dhe i plotë i korporatave është kthyer në çështjen kryesore të ekonomive perëndimore si përgjigje ndaj krizës ekonomike të pandemisë. Ervin Bushati e ka sjellë këtë debat publik në parlamentin shqiptar duke propozuar zbutjen e taksës së punës krahas rritjes së taksës për bizneset e mëdha.

Korporatat, apo të ashtuquajtura biznese shumë të mëdha, janë vënë në të gjithë botën perëndimore nën shënjestrën e institucioneve. Me nisjen e presidencës Biden si dhe me rikthimin e problemit të shmangies së ligjshme nga korporatat shumëkombëshe duket se kjo çështje do të qëndrojë gjatë në debatet publike deri sa të marrë një zgjidhje legjislative. Këtë diskutim e ka sjellë në sallën e seancës plenare deputeti Ervin Bushati.

Gjatë diskutimeve në seancë plenare “Për disa ndryshime dhe shtesa në ligjin “Për buxhetin e vitit 2021”, Bushati deklaroi se kjo është një çështje që do duhet të diskutohet në parlamentin e ardhshëm. Sipas tij është e mundur zhvendosja e barrës fiskale nga profesionistët e lirë, nga njerëzit më produktivë të Shqipërisë, që sot tatohen deri në 23 %, drejt bizneseve të mëdha që tatohen 15%.

“Unë mendojë që ka ardhur koha, ashtu sikurse po flitet sot në G7 në G20, që të vendoset një taksë dysheme për korporatat ndërkombëtare. Sot flitet për një 15 %, por që do të shkojë 18 % dhe 21 % dhe të fillojë të harmonizohet me këtë taksën mbi intelektin. Unë propozoj që taksat për korporatat të fillojë të sinkronizohet me taksën që i vihet punonjësve apo profesionistëve të lirë që paguhen 23 %”, deklaroi Bushati.

Ai shtoi se kjo duhet parë me hapat dhe nëse do kishte një studim, një lloj shkallëzimi 18, 21 e 23 % për korporatat në taksa e pastaj ulja nga krahu i tjetër i punës së ndershme dhe inteligjencës në profesionet e lira nga 23, në 21, në 18 dhe pse jo në 15, të shikohet me prioritet.

“Nuk është normale, dhe ne si shoqëri e majtë duhet ta pranojmë, që një njeri që punon dy-tre punë, ka familje për të mbajtur, është krijues, shtojnë vlera, janë njerëz me reputacion dhe që bëjnë në fakt lajm, të vazhdojnë dhe të taksohen në 23 % kur dividenti është sa ¼ e saj. Harmonizimi i tyre, zhvendosja e kësaj barre në të mirë të shoqërisë është në thelb të teorisë progresive të një force të majtë. Ta bëjmë më progresive taksën progresive. Të thellojmë progresivitetin. Kjo duhet parë në harmonizim edhe me Tatimin mbi Vlerën e Shtuar që në teoritë ekonomike quhet një taksë regresive, sepse TVSH-bë e paguajnë gjithmonë familjet në nevojë. TVSH-në e orizit e paguajnë ata që jetojnë me shportën, TVSH e miellit, e produkteve të përditshme, e paguan shtresa më e varfër e shoqërisë, ndërkohë që shtresa që blen flori, makina, mjete luksi paguan 20 %. Pra unë mendoj se në të ardhmen të kemi rishikim të progresivitetit, të thellojmë progresivitetin”, deklaroi Bushati.

Bushat u shpreh se ky parlament dhe parlamenti tjetër që do të fillojë në Shtator ka për detyrë të krijojë një sens stabiliteti, një sens parashikushemërie dhe programimi për çfarë duhet të ndodhi në të ardhmen”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.