Teknologjitë e informacionit – Edhe për 2017 të fundit në Europë
Shqipëria e mbylli edhe vitin 2017 si vendi i fundit në Europë për zhvillimin e teknologjive të informacionit dhe komunikimit. Revista “Scan Magazine” raporton se vendi ynë nuk ka regjistruar asnjë përmirësim në renditjen globale që kryhet çdo vit nga Unioni Ndërkombëtar i Telekomunikacioneve.
Sipas raportit për matjen e Shoqërisë së Informacionit 2017, Shqipëria renditet në vendin e 89-t në botë, i njëjti pozicion me vitin e mëparshëm.
Indeksi i zhvillimit të teknologjive të informacionit dhe komunikimit përfshin tre indikatorë kryesorë, që janë aksesi në teknologji, përdorimi i teknologjive dhe aftësitë e përdoruesve të teknologjisë.
Po të analizojmë renditjen e Shqipërisë në secilin prej indikatorëve, problemi kryesor është në aksesin e publikut në teknologjitë e informacionit, ku Shqipëria renditet në vendin e 106-të në Botë, në përkeqësim nga pozicioni i 105-të që mbante vitin e kaluar.
Renditja është disi më e mirë në përdorimin e teknologjive, ku Shqipëria renditet e 84-ta në Botë dhe sidomos në aftësitë e përdoruesve të teknologjisë, ku jemi në vendin e 69-të.
Kjo tregon se në thelb problemi kryesor për zhvillimin e teknologjive ngelet aksesi i kufizuar, sidomos në zonat periferike të vendit.
Ende nuk duken rezultate nga iniciativat për të rritur aksesin në teknologji jashtë qendrave të mëdha urbane, përmes investimeve publike ose përmes incentivimit të nismave private.
Vetë zgjerimi i qeverisjes elektronike, që është gjithsesi i ngadaltë, duhet të mbajë parasysh që shërbimet publike të arrijnë edhe në zona ku shqiptarët kanë akses të dobët në teknologji.
Në vendet e Ballkanit Perëndimor, renditjen më të mirë në zhvillimin e teknologjive këtë vit e ka Kroacia, që ndodhet në vendin e 36-të në botë, e ndjekur nga Serbia në vendin e 55-të, Mali i Zi në vendin e 61-të, Maqedonia në vendin e 69-të, dhe Bosnje-Hercegovina në vendin e 83-të.
Renditja botërore për këtë vit kryesohet nga Islanda, e ndjekur nga Koreja e Jugut dhe Zvicra.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.