Tiranë – Durrës me pagesë – Propozimi i pakërkuar mbërrin në Ministrinë e Infrastrukturës: Po e shqyrtojmë
Autostrada Tiranë-Durrës pritet të jepet me koncesion përmes një kontrate të tipit BOT, që nënkupton ndërtimin, operimin e më pas transferimin e saj tek autoritetet shtetërore. Ndërkohë që, në këtë rast bëhet fjalë për zgjerim të saj, duke qenë se kjo vepër është tashmë e ndërtuar. Ndërkaq, përfaqësues të Ministrisë së Infrastrukturës dhe Energjisë thanë për TV SCAN se tashmë është paraqitur një propozim, i cili po analizohet nga ky dikaster ndërkohë që, në vijim te analizimit dhe nëse do te merret ne konsiderate, do të bëhen transparente të gjitha fazat e mëtejshme.
Të njëjtit përfaqësues shtuan se behet fjale për një propozim, ku i gjithë investimi kryhet nga privati, ndërkohë që rruga kryesore parashikohet të jetë me pagesë. Referuar propozimi të mbërritur, kompania private angazhohet të sigurojë edhe rrugët dytësore, që do të jenë pa pagesë, duke iu mundësuar qytetarëve zgjedhje alternative. Sa i takon pagesës së kalimit, do të jetë kompania private ajo që do të vendosë sesa do të jetë, duke marrë parasysh koston e investimit dhe fitimin e saj.
Referuar procedurave standarde, në rastin e propozimeve të pakërkuara, fillimisht ato miratohen nga Këshilli i Ministrave i cili akordon edhe një bonus pikësh për kompaninë që e ka paraqitur, ndërsa më pas hapet një garë zyrtare pranë Agjencisë së Prokurimit Publik, ku mund të dorëzojnë oferta të gjitha kompanitë e interesuara. Fakti që autostrada Tiranë-Durrës do të bëhet me pagesë është paralajmëruar më herët nga Ministri i Infrastrukturës dhe Energjisë, Damian Gjiknuri.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.