“Tkurrja”, më mirë se Europa – Rënia e popullsisë do të jetë më e ulët në vendin tonë
Popullsia aktive për punë në vendin tonë, pra 15 deri në 64 vjeç, do të bjerë me 20% deri në vitin 2025 thotë një raport i fundit i Institutit të Vienës për Studime Ekonomike Ndërkombëtare. Pavarësisht se duken alarmante, projeksionet tregojnë se, në krahasim me vendet e tjera të Europës qendrore dhe jug-lindore, vendi ynë është goxha mirë. Sipas këtyre të dhënave, rezulton se, Shqipëria do të jetë një ndër vendet me tkurrjen më të vogël të popullsisë aktive për punë, mes atyre vendeve ku do të ketë tkurrje, pasi për disa shtete popullsia aktive për punë projektohet të rritet.
Për pjesën dërrmuese të vendeve të Europës qendrore, por edhe vende si Kroacia apo Serbia, norma e tkurrjes projektohet të jetë më e lartë, deri në thuajse 30% në rastin e Bullgarisë. Por alarmi mbetet pasi të gjitha vendet, përfshirë Shqipërinë, krahasohen me nivelet e Japonisë, ekonomi e cila prej dekadash tanimë po përballet me një “bombë” demografike. Sa i përket popullsisë së përgjithshme, projeksionet janë edhe më optimiste, pasi Shqipëria projektohet të jetë shteti me tkurrjen më të vogël deri në 2045.
E ndërkohë që shifrat që vijnë nga instituti i statistikave sinjalizojnë se, Shqipëria po tkurret me ritme të shpejta, të dhënat e institutit të Vienës tregojnë se, po, problemi është i pranishëm, por më pak se te fqinjët rajonalë dhe vendet e tjera të Europës qendrore.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.