Turizmi dhe Çmimet, Mehmeti: Shqipëria, treg që shitet lirë në rajon
Shqipëria është lakuar vazhdimisht nga mediat e huaja për bukuritë natyrore të shumta, megjithatë mbetet një treg që shitet lirë krahasuar me vendet e rajonit.
Në një intervistë për televizionin SCAN kreu i shoqatës së turizmit shqiptar Enver Mehmeti theksoi se për ta përmirësuar këtë treg duhet qëndrueshmëri dije dhe orientim të tregut.
Mehmeti nënvizoi rëndësinë e rritjes së cilësisë së shërbimit për ta bërë më konkurrues këtë sektor me rajonin duke theksuar nevojën për implementimin e shkollave të turizmit në vendin tone.
“Është një treg që shitet ekstremisht lirë, është padyshim detyrimi që ne duhet të rrisim cilësinë e shërbimit, tregu jonë është përfundimisht tregu më i lirë në rajon, nëse ne krahasohemi me tregun e Greqisë. Unë shoh një trend në rritje të tregun shqiptar, dhe kjo duhet të jetë një punë e jashtëzakonshme për të gjithë, për të furnizuar këtë treg të industrisë me të gjithë elementët e nevojshëm, duke filluar që nga recepsionist, kamarier, menaxher, dhe për këtë ka shkolla edukimi, për të qenë konkurruese me vendet e tjera”.
Sipas kreut të ATA, në vendin tonë ka ende shume resurse të pashfrytëzuara të cilat përmes implementimit të politikave nxitëse i japin mundësi të shumta këtij sektori për tu zhvilluar. Aktualisht vendi ynë, sipas statistikave zyrtare ofron 65 mijë shtretër.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.