Vaksinimi / Rama inspekton qendrën e parë: “Fillojmë javën e tretë të janarit”, Manastirliu: “Ritmi, 60 persona në një orë.”

Kryeministri i Shqipërisë, Edi Rama ka inspektuar ambientet e reja në ‘’Air Albania’’ që do të shërbejë si Qendra e Parë e vaksinimit ndaj COVID-19 në vend.Qendra është në instalim e sipër teksa Shqipëria i ka siguruar 500 mijë dozat e para nga Pfizer dhe pret vetëm ardhjen e dërgesës për të filluar me vaksinimin.

Sipas Ramës, synohet që vaksinimi të fillohet para javës së tretë të janarit në Shqipëri, i cili është dhe afati i kontratës me kompaninë Pfizer.

“Në të gjitha rastet ne e fillojmë vaksinimin javën e tretë të janarit por le të shpresojmë se do të fillojmë më shpejt. Jemi në komunikime në të katër anët. Jemi në një fazë shumë pozitive. Kemi siguruar 500 mijë vaksina dhe kemi garantuar një trend vaksinimi që i përgjigjet strategjisë dhe planit të kalendarizuar. Menjëherë do të mbështesim dhe spitalin Covid të Prishtinës, gjithë strukturën e infektivit minimalisht. Do të jemi pranë tyre, nuk diskutohet, pa asnjë hezitim. Për gjithë këtë punë janë bërë të gjitha përgatitjet. Ne jemi gjithmonë një hap para asaj qe vjen.”

Nga ana tjetër ministrja e shëndetësisë, Ogerta Manastirliu tha se qendra të tjera do të hapen paralelisht edhe në zona të tjera të Tiranës, ndërsa radhën më pas e kanë Vlora e Shkodra.

Manastirliu në fjalën e saj ka shpjeguar edhe procedurën se si do të zhvillohet vaksinimi i kategorisë së parë të përfshirë në këtë fushatë.

 “Do të jenë 60 persona çdo një orë është planifikuar që të vaksinohen 60 ose më shumë qytetarë dhe është parashikuar që të vijojë deri në 10 orë puna. Aktualisht kemi bërë gati listat e mjekëve dhe të infermierëve të spitaleve Covid  dhe më pas do të nisë dhe vaksinimi i mjekëve dhe i infermierëve të ambientëve të tjerë. Jemi në fazën ku po trajnojmë ekipet që do të jenë pjesë e procesit të vaksinimit anti Covid.

Ndërkohë do të vijojmë paralelisht me Tiarnën me Vlorën dhe me Shkodrën dhe më pas do të vijojmë dhe me qytetet e tjera. Ne kemi kapacitete që të presim dhe të bëjmë deri në 30 mijë vaksina. Për depot frigoriferike ne tashmë i kemi të siguruar.”, ka thënë Manastirliu

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.