Vala e shkarkimeve – Gjonaj: 46 zyrtarë të Hipotekës dhe ALUIZNI-t largohen nga detyra
46 punonjës të tjerë të administratës, kryesisht të hipotekave dhe ALUIZNI-t janë shkarkuar nga detyra. Lajmin e ka bërë të ditur Ministrja e Drejtësisë, Etilda Gjonaj gjatë një dalje publike për mediat, ku ka informuar publikun për valën e shkarkimeve dhe masat disiplinore të ndërmarra.
Sipas ministres, këto shkarkime kanë ardhur si rezultat i ankesave të qytetarëve në platformën e bashkëqeverisjes www.shqipëriaqeduam.al, duke shtuar se janë zgjidhur brenda afatit 10 ditor.
Ndërkohë, është shprehur vala e shkarkimeve do të vijojë, pasi sipas saj ka ende punonjës që do të identifikohen dhe do të largohen nga puna.
“Ka ende brenda tyre punonjës që duhet ti identifikojmë, por do ti largojmë së bashku. Për çdo ankesë dhe çdo praktikë të qytetarëve që është zgjidhur, është kryer një analizë e detajuar që ka identifikuar edhe punonjësit.”
Po ashtu, ministrja ka deklaruar se janë marrë edhe 45 masa disiplinore, ku 15 zyrtarë të hipotekave dhe ALUIZNI-t kanë marrë paralajmërim për përjashtim dhe në rast përsëritje, do të ndiqen edhe penalisht.
Duke treguar vendosmërinë për të mos toleruar asnjë rast abuzimi me detyrën, ministrja tha se nuk ka asgjë që pengon qytetarët të marrin atë që ju takon brenda afatit kohor të përcaktuar në platformë.
“Kujtoj edhe një herë se çdo ankesë në platformë i shkon drejtpërdrejt ministrit të linjës dhe përgjigja brenda afatit 10 ditor. Ne jemi shumë të vendosur për të mos toleruar asnjë rast abuzimi me detyrën. Qytetarët janë aleati jonë i madh dhe i vetëm në këtë mandat të ri për Shqipërinë që duam. Përfitoj nga rasti t’iu shpreh të gjithë qytetarëve. Kini besim se ska asgjë që ju pengon për të marrë atë që ju takon brenda 10 ditëve. Çdo ankesë e adresuar në platformë është një ndihmë për qytetarin ti bëjmë shërbimet publike model”, u shpreh Gjonaj.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.