“Velça” del në treg – “Pennine” kërkon ortakë, opsion edhe rritja e kapitalit nëpërmjet LSE
Kompania kanadeze Pennine Petroleum që ka marrë nën shfrytëzim bllokun naftëmbajtës Velça është në kërkim të ortakëve të rinj. Pennine kërkon kështu më shumë kapital për të shfrytëzuar bllokun e prodhimit të naftës në vendin tonë.
Drejtori ekzekutiv i kompanisë u shpreh se, Pennine i ka bërë publike të gjitha informacionet në lidhje me këtë bllok naftëmbajtës duke i vënë në dispozicion të interesuarve të gjitha detajet për të vlerësuar potencialin e një investimi të tillë.
Marrëveshja me Albpetrol përmban një kontratë shfrytëzimi me afat 6-vjeçar. Në rast të zbulimit të naftës apo gazit natyror, marrëveshja përfshin një mundësi zgjerimi të kontratës me një afat 25-vjeçar. Duket se është pikërisht kjo arsyeja kryesore se përse, kompania kërkon që të rrisë aktivitetin e kërkimit në vendin tonë. Raporti teknik tregoi se, në rastin më të mirë, nga blloku Velçës mund të dalin 26,400,000 fuçi naftë.
Pjesëmarrja e ortakëve të tjerë do të bëhet në formën e një joint-venture dhe një ndër opsionet e rritjes së kapitalit që po vlerësohet është edhe ajo nëpërmjet Bursës së Londrës. Madje, kompania thotë se, ka shumë interes nga investitorët për të marrë pjesë në këtë iniciativë. Faza e shpim-kërkimit të naftës do të zgjasë 4 vite në total, ndërkohë që dy vite do të jenë vetëm për prodhimin.
Investimi i Pennine në Shqipëri ndërkohë vlerësohet në 2.1 milionë euro, çka tashmë vlerësohet si i pamjaftueshëm nga vetë kompania.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.