Viti akademik nis me kaos – Studentët e pavaksinuar kundërshtojnë policinë
Ndryshe nga çdo vit tjetër, ky vit akademik ka nisur ndryshe për pedagogët dhe studentët. Detyrimi për të qenë të vaksinuar apo të pajisur me një test negativ ndaj COVID, ka sjellë përleshje midis studentëve dhe policisë së vendosur në ambientet e disa fakulteteve si masë sigurie për të mos lejuar asnjë që nuk përbush kriteret që të jetë pjesë e auditoreve.
Kështu, studentët e pavaksinuar janë përplasur me tre punonjës policie të cilët ishin vendosur në hyrje të godinës së Fakultetit të Filologjisë, ndërsa të vaksinuarit apo ata të pajisur me test kanë hyrë normalisht në auditore. Në Universitetin Politeknik të Tiranës gjithashtu ka pasur kontrolle që në hyrje dhe studentët e që nuk dispononin pasaportën e vaksinimit , apo që nuk kanë pasur një dokument se kanë kryer testin PCR , nuk janë lejuar të futen. Disa prej fakulteteve kanë bërë përjashtim, duke lejuar të hyjnë edhe studentët që nuk janë vaksinuar.
Në universitet e Korçës, Durrësit dhe Elbasanit, rektoratet kanë marrë vendim kundër urdhrit të Ministrisë dhe studentët janë futur në auditore dhe thjeshtë po këshillohen, ndërsa Universiteti i Vlorës nuk ka bërë lëshime. Rektori i Universitetit të Tiranës, Artan Hoxha tha pak ditë më parë se rreth 50 për qind e studentëve të universitetit janë vaksinuar, dhe se pjesa më e madhe janë të vitit të parë.
Një pjesë e madhe e studentëve kanë kundërshtuar vendimin e qeverisë për ta bërë me detyrim vaksinimin, me argumentin se është zgjedhja e tyre për shëndetin personal dhe kanë paralajmëruar protesta. Pikat e vaksinimit do të qëndrojnë hapur edhe në javën e parë të nisjes së vitit akademik.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.