VKM/ Asnjë orë pune ‘ekstra’ e nëpunësve civil gjyqësor dhe të prokurorisë nuk do të ‘shkojë dëm’- Çfarë përcakton rregullorja?

Këshilli i Ministrave ka vendosur rregulloren e punës për nëpunësit civilë gjyqësor dhe të prokurorisë.

VKM- ja përcakton kohëzgjatjen e punës, ditët pushim, lejet, shpërblimet, orët në përfundim të turnit, etj. Përjashtuar orarit ‘zyrtar’ të njohur, 40 orë në javë ( 8 orë në ditë), Këshilli i Ministrave ka përcaktuar se orët shtesë në punë,  do të kompensohen në pushim, të barabartë me këto orë ekstra, si dhe me 25% e tyre shtesë.

Kjo përqindje për nëpunësit civilë gjyqësorë dhe të prokurorisë do të bëhet 50%, nëse orët janë kryer në ditë festive, ditë pushimi, apo në fashën orare 22:00- 06:00.

Po ashtu, nëse nëpunësit civilë gjyqësor dhe të prokurorisë do të jenë në krye të detyrës gjatë ditëve festive, puna e kryer ditën e festës zyrtare kompensohet me një shtesë page, jo më pak se 25 për qind ose me një pushim të barabartë me kohëzgjatjen e ditës së punës së kryer.

“Nëpunësi civil gjyqësor dhe i prokurorisë ka të drejtën e pushimit të paguar edhe për rastet, si më poshtë vijon: martesën e nëpunësit civil 5 ditë, martesën e fëmijës së tij 3 ditë, lindjen e fëmijës për baballarët 3 ditë, vdekjen e prindërve, të gjyshërve, të bashkëshortit, të fëmijës, të vëllezërve, të motrave 5 ditë, ndërrimin e banesës 2 ditë, sëmundje të rënda të fëmijëve, prindërve apo bashkëshortit, të vërtetuara me raport mjekësor 5 ditë, përgatitjen dhe mbrojtjen e titujve pasuniversitarë, për punën që kryejnë 10 ditë” përcakton VKM- ja.

Vendimi i Këshillit të Ministrave do të hyjë në fuqi menjëherë pas publikimit në fletoren zyrtare.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.