A është varianti anglez i virusit edhe më vdekjeprurës?
“Varianti anglez” i SARS-CoV-2, i quajtur kështu sepse u zbulua fillimisht në Mbretërinë e Bashkuar, mund të jetë jo vetëm më i transmetueshëm, por edhe më vdekjeprurës. Kjo është ajo që ne lexojmë në një azhurnim të studimeve shkencore mbi këtë temë nga qeveria britanike dhe të botuar në 12 Shkurt 2021. Dokumenti konfirmon dyshimet e njoftuara tashmë disa javë më parë: prognoza për pacientët covid mbetet e favorshme në shumicën e rasteve, por versioni i ri i koronavirusit mund të jetë më i vështirë për tu kapërcyer nga pacientët e dobët.
Varianti anglez që është identifikuar tashmë në 82 vende transmetohet nga 35% në 45% më lehtë sesa format e tjera të koronavirusit, dhe ky mbetet tipari i tij më shqetësues për momentin. Sipas ekspertëve një variant 30% më i transmetueshëm shkakton, në planin afatgjatë, më shumë vdekje sesa një variant 30% më vdekjeprurës, sepse përcakton një rritje eksponenciale të infeksioneve: me kalimin e kohës, bilanci i humbjes i shkaktuar nga i pari rëndohet dhe shkëputet nga ato të shkaktuara nga i dyti.
Të mendosh se një variant më i transmetueshëm është “më pak i rrezikshëm” se një më vdekjeprurës, për fat të keq, është një siguri e rreme. Një formë më e aftë e virusit në qarkullim do të gjejë gjithashtu pacientë më të brishtë për të kolonizuar, me rezultate potencialisht më të tmerrshme.
Shkencëtarët nga Mbretëria e Bashkuar, vendi me renditjen më të përparuar të gjenomeve virale, vlerësojnë se varianti i ri rrit rrezikun e shtrimit në spital të pacientëve të infektuar me 40-60%: nëse shtrimi në spital është një simptomë e formave të rënda të covidit, kjo do të thotë që vdekshmëria është gjithashtu më e lartë. Një nga studimet e cituara në raport, i kryer nga London School of Hygiene & Tropical Medicine, ekzaminoi 3,382 vdekje, 1,722 prej të cilave të njerëzve të infektuar me variantin anglez, dhe vlerësoi se rreziku i vdekjes ishte 58% më i lartë në këtë nëngrup të dytë .
Shumica e rasteve të covidit, përfshirë ato të shkaktuara nga varianti i ri, mbeten jo vdekjeprurëse dhe varianti anglez duket se i përgjigjet mirë vaksinave. Prandaj nuk ka nevojë për alarmim të mëtutjeshëm, përkundrazi për një maturi më të madhe në mënyrë që të mos anulohet efekti vendimtar i fushatave të vaksinimit. Raporti ka disa kufizime që do të plotësohen nga kërkime të mëtejshme, të tilla si numri ende i ulët i rasteve të analizuara dhe vështirësia për të kuptuar se sa vuanin pacientët e vdekur nga sëmundjet e mëparshme. Por nuk mund të injorohet se nga 117,000 njerëz që vdiqën nga covid në Mbretërinë e Bashkuar, gjysma kanë vdekur që nga fundi i nëntorit, kur varianti britanik zëvendësoi atë të mëparshmin në vend.
Arsyet për vdekshmërinë e supozuar të rritur nuk janë ende të qarta: disa studime sugjerojnë që varianti anglez çon në një ngarkesë të shtuar virale, e cila përveç që e bën atë më ngjitëse mund të anulojë efektin e disa terapive të administruara në spital. Por ekziston gjithashtu mundësia që ky version i virusit, duke qenë më ngjitës, të përhapet më lehtë në kontekste të komunitetit me pacientë të brishtë, të tilla si azilet e pleqve: nëse do të ishte kështu, mosha e mëparshme dhe dobësia mund të peshonin mbi numrin e përgjithshëm të humbjeve nga covid. (Focus)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.