Afganistani, drejt krizës shëndetësore – OBSH: Mijëra njësi shëndetësore drejt mbylljes prej ndalimit të donatorëve
Qindra njësi mjekësore në Afganistan ndodhen në rrezik të mbylljes së shpejtë për shkak se donatorët që ofrojnë financim nuk lejohen të bëjnë marrëveshje me qeverinë e re talebane, sipas Organizatës Botërore të Shëndetësisë. Drejtori i emergjencave të Organizatës për Mesdheun Lindor, Rick Brennan, tha se rreth 90% e 2,300 njësive të shëndetësisë në vend ndodhen në rrezik të mbylljes që këtë javë, pasi i etiketoi ato njësi si themelin e sistemit shëndetësor.
“Ai projekt është shtylla kurrizore e sistemit të shëndetësisë në Afganistan. Ne i kuptojmë kufizimet nën të cilat punojnë donatorët tanë dhe ata po shohin për opsione që të mbajnë njësitë mjekësore të hapura. Por ne do të na duhet të ndalojmë operacionet në një përqindje të madhe, me disa vlerësime që tregojnë se mbi 90% do të ndalojnë funksionimin më vonë gjatë javës”, u shpreh Rick Brennan, Drejtori i OBSH për Mesdheun Lindor
Brennan tha se OBSH po përpiqet të mbushë në mënyrë urgjente hendekun duke ofruar furnizime, pajisje dhe financim për 500 prej tyre, që të parandalojë mbylljen. Agjencitë e Kombeve të Bashkuara kanë paralajmëruar për një katastrofë humanitare si pasojë e thatësirave dhe zhvendosjeve dhe kanë thërritur një konferencë ndërkombëtare të ndihmave më 13 Shtator. Duke përkeqësuar situatën, partnerë si OBSH kanë hasur vështirësi për të dërguar furnizime në vend përmes itenerarit kryesor, aeroportin e Kabulit. Megjithatë, Brennan tha se po bashkëpunohet me Katarin për dërgesat mjekësore në javën e ardhshme, duke konfirmuar raportimet se aeroporti i Kabulit pritet të hapet për të marrë ndihma.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.