Aksidentet rrugore – Sulçe: Mungojnë standardet në rrugë. Kostot në ekonomi, të larta
Kostot ekonomike nga aksidentet rrugore në vendin tonë vijojnë të jenë të larta edhe pse nga raportet e institutit të statistikave vihet re një ulje e numrit të aksidenteve dhe viktimave me rreth 17%. Sipas ekspertëve kostot kanë pasur një lëvizje deri në 100 milion dollarë nga rreth 130 milion euro në një vit më parë shifër e bërë publike nga Banka Botërore.
“Fakti që ka një numër më të vogël të humbjes së jetës, prapë është shumë pozitive për arsyen e vetme që në vend ne të shkonim në një funeral, do të shkojmë në një gëzim tek këta njerëz. Nën këtë këndvështrim është pozitiviteti që dhe kjo fushë ka filluar të mendohet që ka vlerën e vetë dhe njerëzit duhet të përgatiten dhe duhet të punojnë që të rrisin mirëqenien e njerëzve dhe jeta ka një vlerë. Zakonisht kostoja e aksidenteve në vendet në zhvillim, ashtu siç është dhe vendi jonë, është 1% e GDP-së. Në këtë këndvështrim mendoj se këtu shkon tek 100 milionë dollarë”, tha eksperti rrugor Artur Sulçe.
Sipas Sulçes edhe pse nuk zënë përqindjen më të madhe të shkakut të aksidenteve, rrugët mbeten problematike për standartet që ofrojnë. Gjithashtu edhe mjetet identifikuese për drejtuesit që janë përdorues të lëndëve narkotike.
“Ne nuk kemi asnjë mjet për të kontrolluar nëse ju jeni nën ndikimin e lëndëve psikotrope apo jo. Është e vetmja në vendin tonë analiza e urinës dhe e gjakut për të nxjerrë që jemi në ndikim apo jo. Besoj, nga mbledhjet që kemi bërë me titullarin e institucionit të Ministrisë së Brendshme, zotin Xhafa, do ta realizojë pajisjen e policisë rrugore dhe me këto elementë. Unë mendoj që rrugët tona nuk janë të sigurta”, tha Sulçe.
Sipas INSTAT, 166 persona kanë ndërruar jetë prej aksidenteve me makinë në rrugë gjatë janar-shtator 2017. Vetëm në muajin shtator 2017 numërohen 172 aksidente rrugore nga 191 aksidente të ndodhur në Shtator 2016. Në krahasim me Shtator 2016, numri i aksidenteve është ulur me 9,9 %.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.