Apple “largohet” nga iPhone – Prezanton shërbime të TV, lojrave dhe pagesave

Apple u përpoq të riprezantohet si një kompani e argëtimit dhe shërbimeve financiare, që prodhon edhe iPhone, pasi prezantoi shërbime të televizionit në rrjet, një kartë krediti dhe një platformë online të lojërave.

Me shfaqje të personaliteteve si Oprah Winfrey dhe Steven Spielberg,  kompania e teknologjisë prezantoi një shërbim të televizionit dhe filmave, të quajtur Apple TV +, që do të transmetojë shfaqje origjinale të televizionit dhe filma. Kjo dështoi të surprizojë investitorët e Apple, pasi aksionet e kompanisë ranë me 1.2%. Përfshirja e kompanisë në luftën e transmetimit të videove vjen shumë vonë përballë liderëve në këtë treg is Netflix dhe Amazon.

Apple ka zgjedhur një qasje tjetër, duke ofruar kanale me pagesë nga HBO, Lions Gate dhe CBS, përveç përmbajtjeve të veta. Apple prezantoi gjithashtu një kartë të kreditit, një platformë dixhitale të videolojërave dhe qindra gazeta në aplikacionin e lajmeve, gjatë eventit në Kaliforni.

“Ne menduam se mund të ndryshojmë mënyrën se si përjetohet dhe kuptohet lajmi. Një vend ku të gjithë lajmet do të vijnë nga burime të besueshme dhe do të jenë të kuruara nga ekspertë” –tha Tim Cook, Kreu ekzekutiv i Apple.

Prezantimet vijnë ndërkohë që Apple po has vështirësi në shitjen e iPhone,  gjë që ka bërë që kompania të përqendrohet në shërbimet, që ofrojnë të ardhura të rregullta nga nënshkrimet.

Klevis Llaha/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.