Banka Botërore rrit kapitalin – Aksionerët e grupit bien dakord për një rritje me $13 mld

Aksionerët e Bankës Botërore ranë dakord këtë fundjavë për një rritje të kapitalit të paguar me 13 miliardë dollarë, që do të rrisë zotërimin e Kinës dhe do të sjellë reforma në huadhënie që do të rrisin kostot e huamarrjes për vendet me të ardhura të mesme e të larta, përfshirë Kinën.

Grupi ndërkombëtar bëri të ditur se plani do ta lejojë që të rrisë huadhënien totale në rreth 80 miliardë dollarë në vitin fiskal 2019, nga 59 miliardë që ishte vitin e kaluar dhe duke e çuar në një mesatare prej rreth 100 miliardë dollarë çdo vit deri në 2030-ën.

“Ne kemi dyfishuar kapacitetin e Bankës Botërore”, tha presidenti i institucionit, Jim Yong Kim, gjatë takimit të pranverës së Fondit Monetar Ndërkombëtar dhe Bankës Botërore në Washington.

Rritja e kapitalit, që u përball  fillimisht me qëndresë nga administrata e Trump,   do të shtojë 7.5 miliardë dollarë kapital të paguar për njësinë kryesore të huadhënies, Bankën Ndërkombëtare pë Rindërtim dhe Zhvillim dhe 6.6 miliardë dollarë për Korporatën Ndërkombëtare të Financave (IFC).

Banka ra dakord të ndryshojë rregullat e huadhënies së Bankës Ndërkombëtare për Rindërtim dhe Zhvillim, duke ngarkuar norma më të larta të interesit për vendet në zhvillim me të ardhura të larta, për të dekurajuar huamarrjen e tepërt.

IBRD më parë ngarkonte norma të njëjta të interesit për të gjithë huamarrësit dhe zyrtarët e Thesarit në SHBA janë ankuar se ka kanalizuar shumë fonde për Kinën dhe tregje të tjera në zhvillim.  Sekretari i Thesarit, Steven Mnuchin tha se e mbështet rritjen e kapitalit për shkak të reformave që përfshin.

Rritja e e fundit nga Banka Botërore ka ndodhur në vitin 2010.  Marrëveshja do të rrisë zotërimin e Kinës te Banka Ndërkombëtare për Rindërtim dhe Zhvillim në 6.01%, nga 4.68%, ndërsa pjesa  e SHBA do të bie lehtë në 16.77% nga 16.89%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.