Bankat me bilance të shëndetshme, ulin interesat – Kreditë hipotekore bien në 3.5%, lehtësim i kushteve për të gjitha kategoritë e biznesit
Bilancet e shëndetshme të bankave dhe primet e ulëta të rrezikut të likuiditetit e të kredisë, me rimëkëmbjen e ekonomisë, kanë ulur normat e interesit e lehtësuar kushtet e kreditimit. Banka e Shqipërisë raporton se interesi mesatar për kredinë e re në lekë dhënë biznesit në tremujorin e dytë të vitit rezultoi 5.4%, nga 5.8% dhe 5.6% që ishte në dy tremujorët e mëparshëm.
Analiza sipas madhësisë së kredisë së lëvruar tregon se interesat janë ulur lehtas për kreditë deri në 35 milionë lekë (kredi që përdoret kryesisht për segmentin e biznesit të vogël), ndërkohë që interesat e kredisë për shuma mbi 35 milionë shfaqen më të qëndrueshme, duke u luhatur në nivele të afërta me tremujorët e mëparshëm.
Interesi i kredisë për individët ka shënuar rënie, duke reflektuar uljen e interesit tek kredia hipotekare në 3.5%, nga 4.5% që ishte prej më shumë se një viti.
Në analizën e saj, Banka e Shqipërisë konkuldon se oferta për kredi ndaj bizneseve u lehtësua në tremujorin e dytë 2021, pas një periudhe shtrëngimi prej pesë tremujorësh me radhë. Relaksimi i masave shtrënguese për frenimin e përhapjes së covid-19, si edhe përmirësimi i balancave të treguesve makroekonomikë e financiarë nga tremujorët e mëparshëm, kanë shtyrë bankat të perceptojnë një rrezik më të ulët kreditimi.
Këto faktorë së bashku iu kanë dhënë shtysë bankave të lehtësojnë standardet e kreditimit për bizneset në të gjitha kategoritë. Segmenti i biznesit të vogël e të mesëm ka përfituar më shumë nga lehtësimi i standardeve të kreditimit.
Individët, sikurse bizneset, shtuan kërkesën për kredi në tremujorin e dytë të vitit, analizon më tej banka e Shqipërisë. Nevojat e shtuara për financim, sidomos ato për kreditë hipotekare, mbështetur edhe nga një kornizë më e konsoliduar faktorësh makroekonomikë, kanë përcaktuar rritjen e shpejtë të kredisë për individë në këtë tremujor.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.