BE pret përgjigjet nga Novavax – Firma amerikane pret të dhënat e nevojshme për miratimin brenda tetorit
Bashkimi Evropian pret që Novavax të paraqesë të dhënat e nevojshme për miratimin e mundshëm të vaksinës së tij COVID-19 rreth muajit tetor, në atë që mund të jetë një vonesë tjetër për firmën amerikane. Novavax nënshkroi një marrëveshje me BE këtë muaj për të furnizuar deri në 200 milionë doza dhe tha se do të përfundonte dorëzimin e të dhënave në Agjencinë Europiane të Mjekësisë (EMA) për miratimin e vaksinës në Europë që në fund të shtatorit.
“Ne presim të dhëna rreth tetorit, por nuk jemi të sigurt për kohën e saktë”, tha një zyrtar i BE i njohur me procesin nën kushtet e anonimatit pasi çështja është konfidenciale. “Gjithçka është shumë e pasigurt” shtoi zyrtari. Sidoqoftë, burimi tha se një vendim për miratimin e vaksinës ishte ende i mundur këtë vit, “për sa kohë që nuk ka më vonesa”.
Novavax tha në një njoftim se kishte në plan të paraqiste të dhënat e saj në BE “brenda disa javësh” nga prezantimi tek rregullatorët britanikë, duke vendosur afatin kohor të mundshëm midis fundit të shtatorit dhe fillimit të tetorit. “Ne jemi të sigurt në këtë afat kohor dhe përparimin që është duke u zhvilluar” tha zëdhënësi. EMA nuk pranoi të komentojë mbi këtë çështje sepse tha se vlerësimi i saj për vaksinën ishte ende në proces.
Vaksina e bazuar në proteina të Novavax përdor teknologji alternative ndaj katër injeksioneve të miratuara tashmë në BE. Vaksinat Pfizer/BioNTech dhe Moderna përdorin teknologjinë e ARN-së, ndërsa dozat e AstraZeneca dhe Johnson & Johnson bazohen në vektorë viralë. Ky fakt e bën vaksinën Novavax më interesante për BE- në, që po kërkon të diversifikojë portofolin e saj të vaksinave.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.