Biden bën thirrje për unitet – Shtetet e Bashkuara përkujtojnë 20-vjetorin e sulmeve të 11 Shtatorit
Presidenti amerikan Joe Biden bëri thirrje për unitet kombëtar ndërsa Shtetet e Bashkuara përkujtojnë 20-vjetorin e sulmeve të 11 shtatorit 2001, që vranë 2,977 persona, duke e quajtur atë forcën më të madhe të Amerikës përballë fatkeqësive.
Gjatë një fjalimi drejtuar kombit, Biden nderoi kujtimet e atyre që u vranë në sulme dhe mijëra të plagosur, si dhe zjarrfikësit, infermierët dhe shumë të tjerë që rrezikuan ose dhanë jetën gjatë misioneve të mëvonshme të shpëtimit dhe gjatë rrugës drejt rimëkëmbjes.
Ai gjithashtu pranoi “forcat më të errëta të natyrës njerëzore, frikën dhe zemërimin, pakënaqësinë dhe dhunën kundër muslimanëve amerikanë, ndjekës të vërtetë dhe besnikë të një feje paqësore”, për të cilat ai tha se kishin përkulur, por jo thyer unitetin amerikan.
“Uniteti është forca jonë më e madhe. Uniteti nuk do të thotë që ne duhet të besojmë të njëjtën gjë. Ne duhet të kemi një respekt dhe besim themelor te njëri-tjetri, dhe te ky komb,” shtoi ai.
Apeli i presidentit për unitet vjen në një kohë kur ndarjet politike mbi pandeminë COVID-19, mandatet e vaksinave, dhe të drejtat e votimit dhe abortit, po rriten në të gjithë vendin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.