Bitcoin kap sërish vlerën rekord prej 66 mijë dollarë – Investitorët kësaj here me një strategji jo të drejtpërdrejtë

Një ditë historike ka ardhur për kriptovalutën më të madhe në botë pasi çmimi i Bitcoin u rrit në një nivel të lartë prej më shumë se 66,000 dollarë, pas fillimit të fondit të parë të tregtuar me Bitcoin.

Kriptomonedha, e cila tregtohej për më pak se një dollar 12 vjet më parë (0,85 €), arriti kulmin gjatë seancës në 66,273 dollarë. Kjo është një rritje prej më shumë se 50 për qind krahasuar me mbi një muaj më parë dhe më shumë se 450 për qind krahasuar me një vit më parë.

Drejt një kriptomonedhe më të qëndrueshme?

“Kjo tregon se ka një oreks të fortë për ekspozimin ndaj bitcoin,” komentoi Fawad Razaqzada, një analist në ThinkMarkets. Ai vuri në dukje se blerja e këtij ETF nuk përfaqëson një investim të drejtpërdrejtë në Bitcoin.

Duke blerë aksione në këtë ETF të ri, investitorët nuk do të bastojnë drejtpërdrejt në Bitcoin, shpjegoi ai. Paratë e tyre do të investohen në kontratat e ardhshme të lidhura me bitcoin. Aspekti indirekt i këtij investimi ishte themelor për rregullatorin e tregut amerikan, SEC, i cili ka paralajmëruar rregullisht për paqëndrueshmërinë e lartë të Bitcoin.

Rregullatorët janë përpjekur të marrin një pozicion mbi temën e kripto-monedhave, rrjeti i decentralizuar i të cilëve është i vështirë për t’u kontrolluar. Sidoqoftë, shumë nga emrat më të mëdhenj të teknologjisë dhe financave të Wall Street kanë njoftuar projekte të reja të lidhura me kriptomonedhën në 12 muajt e fundit. Një vit më parë, më 21 tetor 2020, gjiganti i pagesave në internet Paypal nisi rritjen e çmimeve duke lansuar një shërbim blerjeje, shitje dhe pagese të kriptomonedhës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.