Borxhi i Qeverisë Gjermane – Do të duhet të marrë më shumë hua në tregjet e kapitalit në 2018
Qeveria gjermane planifikon të marrë më shumë hua në tregjet e kapitalit gjatë 2018-ës krahasuar me këtë vit, për shkak se do të duhet të shlyejë më shumë borxh të vjetër, deklaron agjencia e borxhit e Ministrisë së Financave. Qeveria e Kancelares Angela Merkel synon të mbajë buxhetin federal të balancuar për të 5-tin vit radhazi në 2018-ën, gjë që nënkupton se nuk do të ketë nevojë për më shumë huamarrje të re neto.
Megjithatë, Berlini do të duhet të kontaktojë tregjet e kapitalit për shkak se nuk mund të paguajë plotësisht borxhet e vjetra me të ardhurat hyrëse. Duke përjashtuar borxhin e mbrojtur nga inflacioni, agjencia pritet të emetojë 183 miliardë euro borxh në 2018-ën. Kjo shumë është 6.5 miliardë euro më shumë se volumi i emetimeve për vitin aktual.
Agjencia e borxhit deklaroi se planifikon të emetojë 147 miliardë euro në instrumente nominale afat-gjatë në tregjet e kapitalit dhe 36 miliardë euro në instrumente të tregut të parasë. Agjencia shtoi se do të emetojë gjithashtu 6-10 miliardë euro në letra me vlerë të mbrojtura nga inflacioni.
“Qeveria Federale do të duhet të marrë hua më shumë vitin që vjen për shkak se do të duhet të paguajë më shumë borxh të vjetër drejt kreditorëve krahasuar me këtë vit”, deklaron Agjencia.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.