Bota drejt makinave elektrike, IEA: Pritet të trefishohen në 13 milionë automjete pas 2 vitesh
Agjencia Ndërkombëtare e Energjisë bëri të ditur në një raport se makinat elektrike në të gjithë botën do të trefishohen në 13 milionë deri në fund të dekadës, nga 3.7 milionë që u regjistruan vitin e kaluar.
Shitjet mund të rriten me një mesatare prej 24% çdo vit deri në 2030-ën. Raporti vë në dukje shpejtësinë në të cilën sistemi i transportit botëror po zhvendoset drejt karburanteve të pastra, ndërkohë që Qeveritë janë përqendruar në frenimin e ndotjes dhe gazrave serë.
Tesla dhe Nissan shesin disa nga makinat elektrike më të njohura, megjithatë, prodhues të tjerë gjigant si Volkswagen dhe General Motors, kanë ndjekur gjithashtu këtë drejtim duke lajmëruar dhjetëra versione elektrikë të makinave të tyre.
Sipas agjencisë me seli në Paris, zhvillimet politike që po karakterizojnë tregun e makinave elektrike pritet të përqendrojnë investimet në prodhimin e baterive. Kina do të qëndrojë tregu më i madh, ndërkohë që ka zënë më shumë se gjysmën e shitjeve të të gjithë botës për 2017-ën, ndjekur nga SHBA.
Qeveria kineze ka caktuar politika për të inkurajuar përdorimin e makinave elektrike, në përpjekje për të ulur ndotjen nëpër qytete.
Sipas raportit, ndërkohë që makinat elektrike zëvendësojnë përdorimin e naftës dhe benzinës dhe shitjet e tyre pritet të rriten, tregut pritet të mos i nevojiten më 2.57 milionë fuçi në ditë.
Kjo shifër është sa konsumi ditor i Gjermanisë. Ndërkohë që kërkesa për bateri pritet të jetë 15 herë më e madhe në vitin 2013, do të nevojiten më shumë fabrika gjigante të prodhimit, si ajo që miliarderi Elon Musk po ndërton në Nevada.
Sipas raportit, numri i autobusëve elektrikë do të rritet gjithashtu në 1.5 milionë në të gjithë botën deri në 2030-ën, nga 370 mijë që ishte vitin e kaluar.
Kërkesa për kobaltin dhe litiumin pritet të jetë 10 herë më e madhe, ndërkohë që janë ingredientë të përdorur në prodhimin e baterive.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.