BRICS, kundër proteksionizmit-Pesë liderët bëjnë thirrje për rritje të investimeve mes tyre
Liderët e BRICS, grupit të ekonomive në zhvillim, kritikuan proteksionizmin politik në një kohë të ngadalësimit ekonomik në të gjithë botën dhe thanë se vendet e tyre po përpiqen të ndalojnë këtë tendencë.
Në samitin vjetor, liderët e Kinës, Rusisë, Indisë, Brazilit dhe Afrikës së Jugut, bënë thirrje për investime më të mëdha mes tyre dhe që Banka e Re e Zhvillimit, e themeluar nga vendet anëtare, të pompojë më shumë para në financimin e infrastrukturës. “Proteksionizmi po godet tregtinë ndërkombëtare dhe pengon rritjen ekonomike botërore”, the presidenti kinez, Xi Jinping.
Presidenti rus , Vladimir Putin, tha se normat e rritjes eknomike në të gjithë botën janë ngadalësuar vazhdimisht që prej fillimit të 2018-ës dhe do të arrijnë fundin brenda 10 viteve, duke cituar projeksionet e Fondit Monetar Ndërkombëtar. “BRICS po bën të pamundurën për të mbështetur rritjen ekonomike.
Ekonomia botërore është ndikuar nga përdorimi i konkurrencës së padrejtë tregtare, sanksionet e njëanshme, përfshirë ato që janë të motivuara politikisht si dhe proteksionizmi”, tha Putin.
Kryeministri i Indisë, Narendra Modi, tha se vendi i tij synon të kthehet në një ekonomi 5 trilionë dollarëshe deri në 2024-ën, nga 2.6 trilionë që ishte në vitin 2018. Ai shtoi se objektivat e BRICS për investime duhet të jenë më ambicioze.
Presidenti i Brazilit, Jair Bolsonaro, tha se vendi po përpiqet të ndreq besimin ndërkombëtar, por i nevojiten më shumë reforma ekonomike që të tërheq investitorët me një atmosferë pro-biznesit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.