Çmimi i sigurimit të mjetit – Karteli do të vazhdojë edhe këtë vit

Në nëntor të vitit të kaluar, Autoriteti i Konkurrencës mbylli hetimin e radhës për tregut e sigurimit të detyrueshëm motorrik.

Një nga rekomandimet e dhëna, në mënyrë të përsëritur, për Autoritetin e Mbikëqyrjes Financiare, ishte llogaritja e një primi të diferencuar rreziku për secilën prej kompanive të sigurimit.

Megjithë këmbënguljen e Autoritetit të Konkurrencës, në mbledhjen e datës 30 mars, Bordi Drejtues i AMF miratoi tabelën me prime rreziku të unifikuara për të gjitha kompanitë që tregtojnë produktet e sigurimit të detyrueshëm motorrik.

Për sigurimin TPL të autoveturave, primi i rrezikut do të jetë 7 mijë lekë për mjetet me kapacitet motorrike deri në 1600 cm3 dhe 10 mijë lekë për mjetet me kapacitet motorrik më të lartë se 1600 cm3.

Primi i rrezikut është vlera mbi bazën e të cilave duhet të llogariten provigjionet teknike të kompanive të sigurimit dhe nënkupton minimumin e nevojshëm për të mbuluar pagesën e dëmeve eventuale.

Sipas Autoritetit të Konkurrencës, përllogaritja e një primi unik rreziku për të gjitha kompanitë përbën bazën e fiksimit të çmimeve në tregun e sigurimit motorrik për përgjegjësitë ndaj palëve të treta.

Në kushtet kur ligji i ri për sigurimin e detyrueshëm motorrik fle në sirtarët e Ministrisë së Financave dhe askush nuk e di kur do të nisë zbatimi i sistemit bonus-malus, gjasat janë që tregu i sigurimit të detyrueshëm të mjeteve të vazhdojë të funksionojë si një kartel edhe këtë vit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.