Covid-19 ndërpret shërbimet shëndetësore, BB: Gratë dhe fëmijët nën rrezik prej mungesës së barnave dhe kujdesit

Miliona gra dhe fëmijë në vendet e varfëra ndodhen nën rrezik, për shkak se pandemia e koronavirusit ka ndërprerë shërbimet shëndetësore, nga kujdesi neonatal e deri tek imunizimi dhe kontraceptimi, sipas ekspertes së shëndetësisë të Bankës Botërore.  Monique Vledder, shefja e sekretariatit tek njësia e financimit botëror e bankës, tha se agjencia është shqetësuar për numrin e fëmijëve që nuk po vaksinohen, gratë që lindin pa ndihmë mjekësore dhe mungesa e barnave që shpëtojnë jetë, si antibiotikët.

“Jemi shumë të shqetësuar me atë që po ndodh, kryesisht në Afrikën poshtë-Saharasë”, tha Vledder pas publikimit të një raporti që vlerëson ndikimin e Covid-19 tek shëndeti i grave dhe fëmijëve.   Që prej fundit të muajit Mars, njësia e Bankës Botërore ka ndërmarrë sondazhe me staf lokal në 36 shtete, për të monitoruar ndikimin e Covid-19 tek shërbimet themelore të shëndetësisë për gratë dhe fëmijët.  Sipas sondazhit, 87% thanë se pandemia, frika e infeksionit apo e masave të karantinës, kanë sjellë ndërprerje të shërbimeve shëndetësore.

Mbi 75% të vendeve raportuan gjithashtu mungesa në furnizime me barna të rëndësishëm mjekësor, si antibiotikët, për të trajtuar infeksionet, dhe oxitosin, për parandalimin e hemoragjisë pas lindjeve.

Klevis Llaha / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.