Debate për Teatrin në Këshill – Opozita braktis sallën, Veliaj: Po aktroni, vini vetëm për pagat!
Këshilltarët demokratë kanë bojkotuar mbledhjen e radhës së Këshillit Bashkiak që në nisje të saj, pasi kanë marrë fjalën dhe kanë kundërshtuar dhënien me koncesion të ndërtimit të godinës së re të Teatrit Kombëtar.
“Teatri është rastësor në këtë histori. Çështja themelore është trualli poshtë teatrit. Trualli i teatrit është molla e sherrit në këtë qytet. Projekti synon gllabërimin e mijëra metrave katrorë pronë publike në këtë qytet”, deklaroi Kreshnik Çollaku, Kryetar i Grupit të PD
Pasi këshilltarët demokratë kanë lënë sallën, fjalën e ka marrë kryebashkiaku Veliaj i cili tha se opozita shkon në mbledhjet e Këshillit vetëm sa për të marrë pagat. Sipas tij për teatrin është arritur një negociatë me aktorët, ndërsa opozita vetë është duke bërë teatër.
“Ky ishte një audicion, unë e dija që në fillim. Do bëjnë dhe ata si të mërzitur, pastaj pas mërzisë do e mbushin njëherë gjithë mediat, gjithë portelet që do djegin mandatet. Këtu nuk u dogj asnjë mandat, se asnjë nuk do ta humbasë atë 100 mijë lekëshin tani ta pranojmë. Pra edhe pse nuk vijnë, vijnë vetëm sa për të thënë që erdhëm që të marrin lekët. Pyetja është, marrin lekët e popullit. Do bëhet Teatri, siç u bë këndi i lodrave. Ju kujtohet? Fillimisht ishte e kushtëzuar me këndin e lodrave, pastaj u kushtëzua me sheshin “Skënderbej”, pastaj u kushtëzuan me Pazarin e Ri. Tani, këta i kushtëzojnë, projekti bëhet, merr çmime, njerëzit e shijojnë, këta thonë jemi mërzitur prapë. Për çfarë jeni mërzitur, që ecën Tirana mirë?”, tha Veliaj.
Mbledhja e Këshillit ka vijuar me diskutimin dhe miratimin e pikave të përcaktuara në rendin e ditës. Ndërsa këshilltarët demokratë kanë bërë në deklaratë jashtë dyerve të Bashkisë ku theksuan se sjellja e kryebashkiakut Veliaj për teatrin është arbitrare. Ndërkohë Mirela Bogdani, këshilltarja e FRD-së në Bashkinë e Tiranës iu bashkua nismës së opozitës, ndërsa braktisi sallën.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.