“E pamposhtura Merkel” – Kritikat dhe dëshpërimi shoqëruan njoftimin e karantinimit të dytë, por e vendosur zgjedh atë që duhet

Angela Merkel tha se gjermanët kanë shansin për t’i treguar Covid-19 se “ke zgjedhur pritësin e gabuar” ndërsa mbrojti bllokimin e dytë “të butë” që imponoi qeveria e saj. Por këto masa të reja kanë ndezur “klithma” në parlament.

Në një intervistë me shkrimtarin gjerman Mai Thi Nguyen-Kim, kancelarja tha: “Nëse virusi do të mund të mendonte, do të mendonte se po zgjedh pritësin perfekt për vetveten. Këta njerëz jetojnë në të gjithë planetin. Ata janë në rrjet global dhe janë krijesa shoqërore, nuk mund të jetojnë pa kontakte shoqërore. Ata kanë një prirje hedoniste, u pëlqen të bëjnë parti, nuk ka ku të vejë më mirë për mua. ”

Përgjigja e njerëzimit, tha Merkel, duhet të jetë: “Jo, virus, a nuk ke mësuar ndonjë gjë nga evolucioni? Ne njerëzit kemi treguar vazhdimisht se jemi në gjendje të mirë që efektivisht t’u përshtatemi rrethanave të vështira. Ne do të të tregojmë se ke zgjedhur pritësin e gabuar. “

“Ky dimër do të jetë i vështirë, katër muaj të gjatë,” tha ajo ndërsa përfundoi fjalën. “Por do të marrë fund”.

Megjithatë, Merkel që tani po përballet me kritika të forta nga politikanët e opozitës dhe degët e industrisë lidhur me kufizimet e reja, të cilat do hyjnë në fuqi të hënën. Baret, restorantet, teatrot, pishinat dhe studiot e fitnesit do të mbyllen deri në fund të nëntorit dhe tubimet publike do të kufizohen në dy familje dhe deri në 10 persona. Udhëtimet e panevojshme dekurajohen dhe hotelet këshillohen të mos presin më turistë. Shkollat, çerdhet dhe dyqanet, megjithatë, do të qëndrojnë të hapura.

Kufizimet e reja janë dukshëm më pak drakoniane sesa ato të njoftuara nga presidenti francez, Emmanuel Macron, të mërkurën, por bllokimi i “pjesshëm” i Merkel gjithsesi është takuar me thirrje dëshpërimi, veçanërisht nga sektori i mikpritjes.

Pronarët e restoranteve, bareve dhe hoteleve, shumë prej të cilëve kanë investuar në teknologji të re për të përmbushur kërkesat e higjienës, do të goditen rëndë nga mbylljet e reja, pavarësisht premtimeve të ministrisë së financave për subvencione të reja.

E djathta ekstreme Alternative für Deutschland (AfD) dhe Partia Demokratike e Lirë (FDP) e artikuloi akuzën kundër bllokimit të dytë të Merkel dhe në Bundestag. “Ne e konsiderojmë paralizimin e kulturës dhe gastronomisë, praktikisht të gjithë jetën e lirë të qytetarëve tanë, si të tepruar dhe të papërshtatshëm“, tha bashkë-drejtuesi i AfD, Alexander Gauland.

Partia e Gjelbër u shpreh se i miraton masat e reja, por akuzoi qeverinë se kishte nënvlerësuar në verë kërcënimin e një vale të dytë.

Megjithatë, përpos së gjithave, Merkel është e vendosur të zgjedhë atë që duhet karshi asaj që pëlqehet.

Dosti Banushi – SCAN
Burimi: The Guardian

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.