Eksportojmë pjesë këmbimi – 7 milionë euro në 2017, por tregu i makinave ende i papërfillshëm

Shqipëria në krahasim me fqinjët rajonalë ka një treg thuajse inekzistent të automjeteve thuhet në raportin e fundit, që i referohet vitit 2017 të SEE News për këtë lloj tregu në vendet e Europës Jug-lindore. Nuk bëhet aspak fjalë për prodhim, pasi këtu nuk ka krahasim fare por për njësi të shitura.

Sa i përket prodhimit ndërkohë, në të gjithë rajonin gjatë 2017-ës dolën nga fabrika plot 629,014 njësi, ose 0.3% e tregut global. Në Shqipëri ndërkohë nuk ka asnjë linjë prodhimi automjetesh.

Por, edhe kur bëhet fjalë për shitjet, prapë vendi ynë është i fundit në rajon thotë raporti. Me rreth 1500 makina të shitura përgjatë të gjithë vitit të kaluar vendi ynë është i fundit në rajon në këtë drejtim. Bëhet fjalë për makina të reja dhe jo ato të blera në tregun e makinave të përdorura.

Vendet e tjera të rajonit ndërkohë si: Sllovenia ku eksportet e makinave përbëjnë gjysmën e totalit, Serbia ku fabrika e Fiat është e treta më e madhe në vend apo vende si Rumania ku “Dacia” është krenari kombëtare, bazojnë thuajse të gjithë ekonominë e tyre në këtë lloj industrie.

Një tjetër e dhënë ndërkohë tregon se gjatë viteve të fundit në Shqipëri është rritur me shifra dyshifrore tregu i eksportit të pjesëve të këmbimit për makina, çka do të thotë se, ky lloj biznesi në vendin tonë ka potencial ende të madh për t`u rritur edhe më tej.  Të dhënat nga Drejtoria e Përgjithshme e doganave tregojnë se gjatë vitit të kaluar Shqipëria eksportoi pjesë këmbimi makinash në vlerën e 100 milionë lekëve në mënyrë të drejtpërdrejtë, dhe 778 milionë lekë eksport fason. Pra, në total Shqipëria eksportoi drejt vendeve të tjera plot 7 milionë euro pjesë këmbimi për makinat.

Mesa duket biznesi fason në vend operon edhe në sektorin e pjesëve të këmbimit, të cilat duket se kanë një peshë jo të papërfillshme në tregtinë e jashtme të vendit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.