Eurozona po përmbush “profecinë” – 2017, viti më i mirë në një dekadë, fabrikat rekord 20-vjeçar
Fabrikat në Eurozonë kanë regjistruar performancën më të mirë në 17 vitet e fundit gjatë Nëntorit, tregojnë të dhënat më të fundit nga rajoni.
Indeksi PMI që është një ndër matësit më realë të aktivitetit ekonomik u ngjit kështu në 60.1 pikë nga 58.5 pikë që ishte në muajin Tetor.
Të dhënat rezultojnë mbi pritshmëritë ndërkohë që shifra është e dyta më e lartë në të gjithë historinë 20 vjeçare të publikimit të këtij indeksi.
Diçka e tillë sinjalizon se, ekonomia europiane do të vijojë të jetë në vrull edhe përgjatë muajve të fundit të 2017-ës, e me shumë gjasa do ta konfirmojë këtë vrull edhe në tremujorin e parë të vitit të ardhshëm.
Të dhënat sinjalizojnë gjithashtu se, prodhimi dhe eksportet do të japin një kontribut thelbësor në rritjen e ekonomisë europiane përgjatë këtij viti.
Ky vit vlerësohet gjerësisht të jetë më i miri në dekadën e fundit në Eurozonë.
Nën-indikatori që i referohet prodhimit ndërkohë u ngjit në 61 pikë, që është niveli më i lartë që prej Shkurtit të vitit 2011.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.