Fitch surprizon Portugalinë – Rrit me dy nota vlerësimin e borxhit, hera e parë në histori
Agjencia e vlerësimeve, Fitch ka rritur në mënyrë të paprecedentë me dy nota borxhin sovran të Portugalisë, në nivelin e investimeve. Kjo do të thotë se, dy nga tre agjencitë kryesore të vlerësimit tashmë i japin vendin të dalë nga kriza një notë investimi.
Fitch e lëvizi vlerësimin nga BB+ në BBB me perspektivë të qëndrueshme, pra dy nota lëvizje. Agjencia nënvizon kështu një ulje të ndjeshme të borxhit publik në raport me Prodhimin e Brendshëm Bruto.
“Dinamika e favorshme e borxhit, e nxitur nga një kombinim i masave të mëparshme fiskale, rimëkëmbja aktuale si dhe një përmirësim të kushteve financiare”.
Ky përmirësim vjen pavarësisht faktit se, Fitch pret që deficiti buxhetor të mbetet i pandryshuar, në 1.4% të PBB gjatë vitit të ardhshëm, që është ndjeshëm mbi nivelin e projeksioneve të qeverisë, prej 1.1% të PBB.
Ministria e financave deklaroi se, kjo ishte hera e parë që një agjenci vlerësimi rrit me dy nota borxhin e Portugalisë dhe se ky ishte një rezultat i përpjekjeve disa vjeçare të vendit.
Përmirësimi kthehet në kosto më të ulta huamarrje në të ardhmen për Portugalinë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.