Fitimet në sigurime – Bien me 20% për vitin 2016

Fitimet e industrisë së sigurimeve kanë rënë ndjeshëm gjatë vitit 2016. Sipas të dhënave nga Autoriteti i Mbikëqyrjes Financiare, fitimi i kompanive të sigurimit zbriti në 493 milionë lekë, rreth 20% më pak krahasuar me vitin 2015.

Rënia e fitimeve erdhi sidomos nga tregu i sigurimit të jetës, ku rezultati financiar i kompanive u tkurr në 77 milionë lekë, ndërkohë që një vit më parë kishte qenë tre herë më i lartë.

Ndërkohë, në sigurimin e jo-jetës fitimet u rritën me afro 10%, për një shumë neto në vlerën e 416 milionë lekëve.

Rritja e fitimeve në sigurimet jo-jetë erdhi kryesisht falë rritjes së ndjeshme të rezultatit teknik, që nënkupton fitimet nga aktiviteti sigurues, pa llogaritur bilancin e të ardhurave dhe shpenzimeve financiare apo zëra të tjerë. Në thelb, siguruesit kanë fituar më shumë prej primeve të arkëtuara.

Ashtu siç ndodh prej vitesh, edhe në vitin 2016 statistikat konfirmuar se siguruesit shpenzojnë më shumë për nevojat e tyre operative dhe administrative, sesa për të paguar dëme. Për vitin e kaluar, raporti dëme/prime ishte më pak se 30%, ndërsa raporti shpenzime/prime ishte afro 67%.

Nga tetë kompani të sigurimit të jo-jetës, pesë prej tyre e mbyllën vitin 2016 me fitim. Shoqëria që siguroi fitimet më të larta për vitin e kaluar ishte Sigal, me 366 milionë lekë, e ndjekur me radhë nga Albsig, Insig, Intersig dhe Atlantik.

Me humbje e mbyllën vitin 2016 Ansig, Eurosig dhe Sigma Interalbanian. Edhe në tregun e jetës, fitimet më të mëdha i ka siguruar Sigal Life, me 125 milionë lekë. Edhe Insig Life ka regjistruar një fitim modest, ndërsa SiCRED e ka mbyllur vitin 2016 me humbje.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.