Franca në stanjacion – Aktiviteti i biznesit në kontraktim gjatë Marsit
Aktiviteti i biznesit në ekonominë e dytë më të madhe të Eurozonë është ngadalësuar ndjeshëm gjatë tremujorit të parë të vitit, tregojnë të dhënat më të fundit të Markit. Indeksi Pmi që mat aktivitetin në manifakturë dhe shërbime ra në 48.7 pikë këtë muaj, duke rënë nën nivelin e 50 pikëve. Është pikërisht ky nivel që ndan rritjen nga kontraktimi. Kërkesa për porosi të reja ra me hapin më të shpejtë në thuajse 3 vite.
Madje, një pjesë e madhe e bizneseve të anketuara nga Markit akuzojnë jelek-verdhët dhe protestat e tyre, por edhe shtyrjen e zgjedhjeve në Algjeri si shkaktarët kryesorë të kësaj situate. Sipas Markit firmat janë bërë më pak optimiste në një situatë të tillë.
Pasiguria është ndjeshëm më e lartë në Francë sot. Ekspertët shprehen se, sektori privat në vend ka qenë i pamundur të vazhdojë vrullin e regjistruar gjatë muajit shkurt. Të dhënat e fundit sinjalizojnë një stanjacion të ekonomisë franceze, thonë ekspertët.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.