Japonia “goditet” nga lufta tregtare – Jeni i fortë dhe tarifat në SHBA cënojnë ekonominë e varur nga eksportet

Humori i bizneseve në Japoni është përkeqësuar për të parën herë në 2 vite gjatë tremujorit të parë,  ndërkohë që jeni i fortë ka rënduar firmat eksportuese në një kohë të rimëkëmbjes së qëndrueshme ekonomike.  Shqetësimet mbi luftën tregtare, të nxitura nga tarifat në importe të lajmëruara nga Administrata e Donald Trump, pritet të përkeqësojë gjithashtu ndjesinë e korporatave, tashmë që Kina është kundërpërgjigjur.

Sipas sondazhit të Bankës së Japonisë, humori i firmave prodhuese dhe atyre të shërbimit është përkeqësuar, dhe sipas kompanive, kushtet pritet vazhdojnë në tremujorin e dytë.  Tregjet globalë u tronditën muajin e kaluar kur Trump lajmëroi tarifa për mallrat kinezë dhe kundërpërgjigja e Pekinit ka shtuar shqetësimet për luftën tregtare.

Sipas politikëbërësve japonez, jeni i fortë dhe përplasjet tregtare mund të dëmtojnë ekonominë e varur nga eksportet, që ka përfituar deri më tani nga kërkesa e fortë globale.  Ekonomia e Japonisë është rritur për 8 tremujorë radhazi, që është periudha më e gjatë e ekspansionit që prej flluskës së viteve 90.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.