JPMorgan parashikon krizën e ardhshme – Në 2020-ën. Krizë likuiditeti dhe rënie e aksioneve në SHBA me 20%
Banka amerikane JPMorgan, ka krijuar një model që synon të masë kohën dhe përmasën e krizës së ardhshme financiare. Sipas tyre, investitorët duhet të ruhen në vitin 2020.
Lajmi pozitiv është se kriza tjetër nuk do të jetë aq e dhimbshme sa ajo që ndodhi 10 vite më parë, por tkurrja e likuiditetit në tregjet financiarë që prej vitit 2008, do ta vështirësojë situatën.
Modeli i JPMorgan llogarit pasojat e bazuara në kohëzgjatjen e ekspansionit ekonomik, kohëzgjatjen e mundur të recesionit të ardhshëm, levën financiare, vlerësimet e çmimit të aktiveve dhe nivelin e derregullimit dhe rinovimit financiar përpara krizës.
Duke marrë parasysh një recesion të përmasave mesatare, modeli arriti në një rezultat për performancën e klasave të ndryshme të aktiveve në krizën e ardhshme.
Sipas tyre, pritet një rënie e titujve të kapitalit në SHBA me 20%, rritja e primit të yieldit të obligacioneve korporatave me 1.15%, një rënie me 35% e çmimeve të energjisë, 29% rënie në metalet bazë, një rritje me 2.79% e spread-it me borxhin e ekonomive në zhvillim, një rënie me 48% e aksioneve të tregjeve në zhvillim dhe një humbje prej 14.4% të valutave të tyre.
Sipas analistëve të JPMorgan, rënia e investimeve të manaxhuara në mënyrë aktive, kundrejt rritjes së fondeve që ndjekin indekset dhe fondet e listuara në bursë, ka shtuar rrezikun e ndërprerjeve në tregje.
JPMorgan paralajmëroi për një “Krizë të Madhe të Likuiditetit” në të ardhmen. Sipas tyre, rritja e manaxhimit pasiv të aktiveve do të reduktojë aftësinë e tregut për të parandaluar rëniet e mëdha.
Llogaritë e manaxhuara në mënyrë aktive zënë vetëm 30% të titujve të kapitalit nën manaxhim. Ky ndryshim ka eliminuar një sasi të madhe të aktiveve që do të ishin të gatshme për të blerë letra me vlerë publike të lira dhe të parandalonin një ndërprerje të tregut.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.