Këshilltarët e FDA, miratim të pjesshëm – Doza e tretë të përdoret për personat mbi 65 vjeç dhe ata me rrezik
Këshilltarët e Administratës së Ushqimeve dhe Barnave në Shtetet e Bashkuara të Amerikës votuan për të rekomanduar dozën e tretë të vaksinës kundër Covid-19 për amerikanët mbi 65 vjeç dhe për ata me rrezik të lartë të sëmundjes. Në këtë mënyrë, paneli i këshilltarëve ka refuzuar përdorimin e dozës mbështetëse më masë të gjerë.
Gjithashtu, paneli rekomandoi që FDA të përfshijë në këtë program vaksinimi edhe punonjësit e kujdesit shëndetësor dhe të tjerët që janë në rrezik të lartë të ekspozimit ndaj virusit, si mësuesit. Pavarësisht shtrirjes së kufizuar të autorizimit për vaksinim, rekomandimi i panelit të këshilltarëve të FDA mbulon shumicën e amerikanëve që kanë marrë dozat në fazat e hershme të fushatës së vaksinimit.
Ndërkohë, FDA pritet t’a marrë së shpejti vendimin përfundimtar mbi dozën e tretë. Vendimi i FDA nuk lidhet me rekomandimin e panelit, por merret parasysh. Me një votim 16 me 2, anëtarët e Komitetit Këshillimor të FDA refuzuan të rekomandojnë një dozë të tretë të vaksinës së Pfizer/BioNTech për të gjithë personat mbi 16 vjeç, gjashtë muaj pasi kanë marrë dozën e dytë.
Paneli sugjeron se të dhënat në dispozicion janë të pamjaftueshme dhe dëshirojnë të shikojnë të tjera të dhëna mbi sigurinë, veçanërisht në lidhje me rrezikun e inflamacionit të zemrës tek të rinjtë. Në anën tjetër, anëtarët e panelit miratuan në mënyrë unanime rekomandimin për injektimin e dozës së tretë për personat mbi 65 vjeç dhe të tjerët me rrezik të lartë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.