Klinikat në “sitë” – Ligji i ri: Pas licencimit do të kalojnë në proces akreditimi

Të gjitha institucionet e kujdesit shëndetësor, pas licencimit të veprimtarisë do të duhet t’i nënshtrohen procesit të vlerësimit të përmbushjes së standardeve bazë të cilësisë për akreditim”. Gjithçka përcaktohet në projektligjin” Për kujdesin shëndetësor”, i propozuar nga Këshilli i Ministrave, i cili tashmë ka mbërritur në Kuvend për diskutim. Kërkesa e re shtohet në nenin e ligjit që saktëson cilësinë e shërbimit, ndërkohë që sipas propozimit të ri, “ procesi i akreditimit do të nisë vetëm në rastin kur institucionet shëndetësore të plotësojnë standardet bazë të cilësisë për akreditim”.

Ndërkohë që, në rast të mospërmbushjes së këtyre standardeve bazë të cilësisë, këtyre institucioneve do t’iu pezullohet licenca. Gjithashtu, ligji i ri përcakton se, nëse edhe pas përfundimit të periudhës së pezullimit institucioni i kujdesit shëndetësor nuk ka përmbushur standardet bazë të cilësisë për akreditim, ministri përgjegjës për shëndetësinë vendos revokimin e licencës për ushtrimin e veprimtarisë.

Ndërkaq, sa i takon  proceduarave që do të ndiqen për pezullimin dhe revokimin e licencës, si dhe afatet përkatëse, ato do të përcaktohen me urdhër të ministrit të shëndetësisë . Propozimet për ndryshimet ligjore do të duhet të diskutohen nëpër komisionet parlamentare, për të shkuar më pas në seancë plenare për miratim.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.