Konkursi për punonjësit e ALUIZNI-t, Lame: Dyert të hapura për ata që duan të bëhen pjesë e institucionit. Ja sa legalizime u kryen për 4 vite, 4.8 mld lekë për kompensimin e ish-pronarëve
Drejtori i Përgjithshëm i ALUIZNI-t në një deklaratë për mediat pohoi se procesi i legalizimit përbën një histori suksesi, ku sipas tij ky proces iu kthye qytetarëve. Po në këtë dalje për mediat, Artan Lame ka thënë se institucioni që ai drejton do të futet në një proces riformatimi dhe rikonkurimi nga specialisti më i thjeshtë i administratës, deri te drejtori rajonal.
“I deklaroj të hapura dyer e institucionit për ata që duan të bëhen pjesë. Këtij procesi konkurrimi do t’i nënshtrohet i gjithë stafi ynë. Kjo është e domosdoshme, pasi kemi një numër të madh punonjësish që janë bërë pengesë dhe ka pasur shumë ankesa për ta. Kërkohen inxhinierë, topografë, specialistë. ALUIZNI do të kthehet në shembull për të gjitha institucionet.”
Më gjatë, Lame foli edhe për procesin e legalizimeve gjatë këtyre katër viteve, ku u ndal edhe mbi ecurinë e procesit në disa qarqe.
“Janë realitet tashmë legalizimet falas, të cilët u kthyen në një histori suksesi dhe askush nuk e vë në diskutim. Kur morëm detyrën në këtë institucion gjetëm vetëm 21 mijë legalizime, ndërsa sot mund të themi se janë kryer 144 154 legalizime. Ajo çfarë dua të them është se rreth 88 për qind e procesit të legalizimit tashmë ka përfunduar, ndërkohë që matjet në terren kanë përfunduar në 95 për qind të rasteve. Konkretisht në Tiranë janë kryer mbi 36 mijë legalizime, në Durrës mbi 27 mijë dhe në Fier, mbi 14 mijë legalizime”
Lame foli edhe për të ardhurat e grumbulluara, të cilat kanë shkuar për procesin e kompensimit të ish pronarëve.“U grumbulluar 4.8 miliardë, lekë që kanë shkuar për procesin e kompensimit të ish- pronarëve.”
Më tej kreu i ALUZINI-t foli edhe për procesin e hipotekimi të pallateve.
“Legalizimi apo hipotekimi i pallateve është një nga proces më të vështira, jam i kënaqur që procesi po ecën. Përmbyllja tërësore e procesit të legalizimit kërkon ndryshime të tjera ligjore, kjo për t’i dhënë fund problemeve”, u shpreh Lame.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.