Kostot e kthimeve të veshjeve ‘shkatërrojnë’ kompanitë e mëdha

Disa nga markat më të njohura të veshjeve janë duke kuptuar që thuajse një e treta e veshjeve dhe këpucëve janë ose më të mëdha ose më të vogla se numri që mbajnë.

Kjo shpjegon dukurinë në rritje të kthimit të artikujve nga ana e klientëve. Thuajse gjysma e shtetasve amerikanë kthejnë rrobat pasi I kanë blerë ato. Artikujt që kthehen më shumë janë fustanet, masat e të cilëve ndryshojnë më shumë nga masat e reklamuara në faqen online.

Kompanitë pranojnë që kthimi mbrapsht i artikujve kushton për dy arsye: klientët largohen të pakënaqur dhe gjithashtu duhet kryer nga fillimi procesi i ri vendosjes në inventar.

Dizenjuesit e firmave thonë që përcaktimi i masës së saktë është një sfidë më vete: “njerëzit që jetojnë në vendet nordike duan veshje të gjera. Ata që jetojnë në hemisferën jugore preferojnë rroba të ngjitura pas trupit”. Për kompaninë gjermane të shitjeve online, Zalando, kthimi i veshjeve ka shkaktuar ¾ e humbjeve si dhe ulje drastike të vlerës së aksioneve.

Problemin me masat e kanë kuptuar shitësit online të veshjeve apo kompanitë e veshjeve si Zara, H and M e të tjerë duke gjetur mënyra të ndryshme për ta shmangur. Zara dhe H&M përdorin një aplikacion i cili përcakton masat nëpërmjet peshës dhe gjatësisë. Ndërsa, Zalando përdor modele meshkuj ose femra të cilët provojnë veshjet dhe këpucët për të përcaktuar masën dhe problem të tjera që mund të kenë produktet si aromat e pakëndshme.

Kompani të tjera kanë zgjedhur mjetë më teknologjike. Figleaves, kompania britanike e veshjeve të brendshme, iu lejon konsumatorëve të flasin nëpërmjet Skype-t me një asistent shitjesh. Ndërsa Mango përdor softaware-n Fit Analysis.

Burimi: Reuters

Përshtati për Scan: Ergisa Bejkollari

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.