Kreditimi i ekonomisë – Dominojnë BKT dhe Credins

BKT dhe Credins u konfirmuan bankat më aktive në rritjen e kreditimit për sektorin privat të ekonomisë edhe për vitin 2016. Sipas të dhënave të paaudituara nga Shoqata Shqiptare e Bankave, BKT dhe Credins e rritën më tej pjesën e tyre të tregut në kreditim, ndërsa Raiffeisen dhe Intesa Sanpaolo mbyllën një tjetër vit në rënie.

BKT në fund të vitit të kaluar zotëronte një portofol kredie në vlerën e 129 miliardë lekëve. Kjo shumë i siguronte një pjesë tregu prej afro 21.7%, nga 19.8% që  mbante në fund të vitit 2015.

Raiffeisen Bank mbajti vendin e kreditorit të dytë më të madh të ekonomisë, me 18.5% të totalit, por në rënie nga niveli 19.6% i një viti më parë. Credins vijoi trajektoren e rritjes edhe për vitin e kaluar zotëronte një portofol kredie në vlerën e 94.5 miliardë lekëve.

Pjesa e tregut e Credins është rritur në 15.9%, nga 14.9% që ishte në vitin 2015. Bankat e tjera për momentin janë mjaft larg. Banka Intesa Sanpaolo ka hequr dorë prej vitesh nga rritja agresive dhe vitin e kaluar pjesa e saj e tregut u tkurr sërish në 7.6%, nga 7.7% që kishte qenë një vit më parë.

Ndërkohë, banka Societe Generale Shqipëri vazhdoi rritjen edhe gjatë vitit të kaluar, duke u bërë banka e katërt më e madhe për nga vlera e portofolit të kredisë.

Societe Generale zotëronte 7.9% të totalit të kredisë për ekonominë, duke e zbritur bankën Intesa Sanpaolo në vendin e pestë. Bankat e tjera, në shumicën dërrmuese, vitin e kaluar mbyllën një vit pasiv në kreditim.

Tre bankat greke, Tirana Bank, Alpha Bank dhe NBG Bank humbën më tej pjesë tregut, ashtu si edhe ProCredit Bank dhe Veneto Banka. Ndër banka e pakta jashtë grupit të më të mëdhenjve që fitoi treg vitin e kaluar ishte Union Bank, që arriti në rreth 3.1% të portofolit total të kredisë.

Kjo dëshmon se edhe vitit 2016 u dominua nga bankat me baza të forta lokale, ndërkohë që bankat e grupeve të Eurozonës, me pak përjashtime, kanë hequr dorë nga rritja agresive dhe po vazhdojnë një strategji konsolidimi.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.