Le Pen konfirmon daljen nga euro – Në rast të panikut bankar, do të vendosë kontrolle të kapitalit

Kandidatja e ekstremit të djathtë Marine Le Pen tha se do të konsiderojë kontrollet e kapitalit nëse fiton ditën e diel, në rast se ndodh një panik bankar kur të negociojë daljen e Francës nga Bashkimi Europian.

Le Pen ka konfirmuar këtë javë se kërkon të dalë nga valuta e përbashkët europiane.

“Euro nuk ka mbrojtur askënd, përkundrazi, ka qenë barrë për çmimet, vendet e punës dhe konkurrueshmërinë e bizneseve francezë”, tha Le Pen duke shtuar se do të ishte më e thjeshtë ta nisje ekonominë pa valutën e përbashkët.

Le Pen tha se kërkon ta zëvendësojë euron me një valutë kombëtare që do të vijë në formën e Njësisë Valutore Europiane (ECU) dhe shtoi se do ta bëjë këtë brenda dy viteve në pushtet.

Ndërkohë që mbështetësit e Frontit Nacional kërkojnë kthimin mbrapsht te franga, sondazhet tregojnë se ¾ e votuesve francezë duan të  mbajnë valutën e përbashkët, duke sjellë një barrë për Le Pen.

Franca është një vend anëtar themelues i Bashkimit Europian dhe investitorët mendojnë se dalja nga euro do të sillte shpërbërjen e unionit.

Le Pen hodhi poshtë shqetësimet mbi sektorin financiar duke thënë se dalja nga Bashkimi nuk do të sjellë një krizë bankare. Megjithatë ajo shtoi se do të vendosë kontrolle mbi kapitalin nëse kursimtarët vrapojnë për të marrë paratë nga bankat.

Le Pen tha se do të nisë negociatat me BE menjëherë pas fitores, për të rifituar sovranitetin e vendit. Ndër këto negociata përfshihen dalja nga euro, rifuqizimi i kufijve francezë dhe rimarrja e aftësisë për të vendosur mbi ligjet franceze në mënyrë të pavarur.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.